സിറ്റി ആദ്യ പ്രീമിയര്‍ ലീഗ് കിരീടം നേടിയ അഗ്വേറോയുടെ ഗോളിൻ്റെ പത്താം വാര്‍ഷികം ആഘോഷിക്കുന്നതിൻ്റെ ഭാഗമായി മാഞ്ചസ്റ്റര്‍ സിറ്റി ഇത്തിഹാദ് സ്റ്റേഡിയത്തിന് പുറത്ത് സെര്‍ജിയോ അഗ്വേറോയുടെ ഒരു പ്രതിമ അനാച്ഛാദനം ചെയ്തു.

ക്വീന്‍സ് പാര്‍ക്ക് റേഞ്ചേഴ്സിനെതിരെ 3-2ന് വിജയിച്ച മത്സരത്തില്‍ ഇഞ്ച്വറി ടൈമില്‍ അഗ്വേറോ നേടിയ ഗോളിൻ്റെ ഓര്‍മ്മയില്‍ ആണ് പ്രതിമ നിര്‍മ്മിച്ചിരിക്കുന്നത്. 44 വര്‍ഷത്തിനിടെ സിറ്റിയുടെ ആദ്യ ലീഗ് കിരീടം ആയിരുന്നു ആ ഗോള്‍ അന്ന് ഉറപ്പിച്ചത്.

മാഞ്ചസ്റ്റര്‍ സിറ്റിയില്‍ ഒരു ദശാബ്ദത്തിലേറെയായി കളിച്ച അഗ്വേറോ 390 മത്സരങ്ങളില്‍ നിന്ന് 260 ഗോളുകള്‍ നേടി അവരുടെ എക്കാലത്തെയും മികച്ച ഗോള്‍ സ്‌കോററായാണ് ക്ലബ് വിട്ടത്. മാഞ്ചസ്റ്ററിലെ എൻ്റെ ഫുട്ബോള്‍ കരിയറിനുള്ള അംഗീകാരമായി ഈ പ്രതിമ നിര്‍മ്മിച്ചതിന് ക്ലബ്ബിനോട് ഞാന്‍ വളരെ നന്ദിയുള്ളവനാണ് എന്നും ഇത് വളരെ സവിശേഷമായ നിമിഷമാണ് എന്നും അഗ്വേറോ പറഞ്ഞു.