കാഞ്ഞങ്ങാട് / കോഴിക്കോട്: സ്പോര്ട്സ് ലേഖകനും സുപ്രഭാതം ദിനപത്രം കോഴിക്കോട് യൂണിറ്റിലെ സീനിയര് റിപ്പോര്ട്ടറുമായ യു.എച്ച് സിദ്ദിഖ്(42) അന്തരിച്ചു. കെ.യു.ഡബ്ല്യൂ.ജെ തിരഞ്ഞെടുപ്പ് പ്രചാരണത്തിനായി കാസര്കോടേക്കുള്ള യാത്രയ്ക്കിടെ ട്രെയിനില് കുഴഞ്ഞുവീഴുകയായിരുന്നു. കാഞ്ഞങ്ങാട്ടെ സ്വകാര്യ ആശുപത്രിയിലെത്തിച്ചെങ്കിലും മരണം സംഭവിച്ചു.
ഇടുക്കി വണ്ടിപ്പെരിയാര് സ്വദേശിയാണ്. കെ.യു.ഡബ്ല്യു.ജെ സംസ്ഥാന സമിതി അംഗമാണ്. തേജസ്, മംഗളം എന്നിവിടങ്ങളിലും റിപ്പോര്ട്ടറായി പ്രവര്ത്തിച്ചിട്ടുണ്ട്. കായികമേഖലയിലെ റിപ്പോര്ട്ടിങ്ങിന് നിരവധി പുരസ്കാരങ്ങള് നേടിയിട്ടുണ്ട്.
ഇനിയും ഏറെ ഉയരങ്ങള് കീഴടക്കേണ്ടിയിരുന്ന കഠിനാധ്വാനിയും ഈര്ജ്ജസ്വലനുമായ മാധ്യമ പ്രവര്ത്തകനായിരുന്നു. കായിക വാര്ത്തകള് റിപ്പോര്ട്ട് ചെയ്യുന്നതിലുപരി മിടുക്കരായ കുട്ടികളെ പ്രോത്സാഹിപ്പിക്കാനും അവരെ മുന്നിരയിലേക്ക് എത്തിക്കാനും ഈ യുവമാധ്യമ പ്രവര്ത്തകന് ശ്രദ്ധ പുലര്ത്തിയിരുന്നു. കുടുംബാംഗങ്ങളുടെയും സഹപ്രവര്ത്തകരുടെയും സുഹൃത്തുക്കളുടെയും ദുഃഖത്തില് സമൂഹത്തിൻ്റെ വിവിധ കോണിലുള്ളവർ അനുശോചനം രേഖപ്പെടുത്തി.
