കണ്ണൂർ: കണ്ണൂർ അന്താരാഷ്ട്ര എയർപോർട്ടിലൂടെ യാത്ര ചെയ്യുന്ന ലക്ഷക്കണക്കിന് പ്രവാസികളുടെ യാത്രാ ദുരിതങ്ങൾക്ക് പരിഹാരം കാണുന്നതിന് വേണ്ടി ‘കണ്ണൂർ എയർപോർട്ട് ആക്ഷൻ കൗൺസിൽ’ പ്രവർത്തനം സജീവമാക്കുകയാണ്. ഇതിൻ്റെ ഭാഗമായി ലോകമെമ്പാടുമുള്ള പ്രവാസികളുടെ നേതൃത്വത്തിൽ കൗൺസിൽ ഭാരവാഹികളെ ജനാധിപത്യരീതിയിൽ തിരഞ്ഞെടുക്കുന്നു. തിരഞ്ഞെടുപ്പ് നടത്തുന്നതിനുവേണ്ടി ‘ഇലക്ഷൻ റിട്ടേർണിംഗ് ഓഫീസർമാരെ’ തിരഞ്ഞെടുത്തതായി ഭാരവാഹികൾ അറിയിച്ചു. റിയാസ് അരിങ്ങലോട്ട്, ലിബേഷ് വാഴയിൽ, ജോസ് ലുക്കോസ്, നൗഷാദ് സി.പി, അബ്ദുള്ള കെ.കെ, രാജേഷ് നാരായണൻ, മാത്യു ജോർജ് വെള്ളരിങ്ങാട്ട്, നൗഷാദ് യു.കെ, അഞ്ചാംകുടി രാജേഷ്, സിബി ആന്റണി എന്നിവരെയാണ് വിവിധ രാജ്യങ്ങളിൽ നിന്നും തിരഞ്ഞെടുത്തത്.
ആക്ഷൻ കൗൺസിൽ ഗ്ലോബൽ ചെയർമാനായി, കണ്ണൂർ – തിരൂർ സ്വദേശിയായ രാജീവ് ജോസഫിനെ, ലോകത്തിൻ്റെ വിവിധ ഭാഗങ്ങളിൽ നിന്നുള്ള ആയിരത്തി അഞ്ഞൂറിലധികം വരുന്ന പ്രവാസികൾ ഐക്യഖണ്ഡേന തിരഞ്ഞെടുത്തു. ആക്ഷൻ കൗൺസിലിൻ്റെ വൈസ് ചെയർമാൻമാർ, ജനറൽ സെക്രട്ടറിമാർ, സെക്രട്ടറിമാർ, ട്രഷറർ, ജോയിന്റ് ട്രഷറർ, എക്സിക്യൂട്ടീവ് അംഗങ്ങൾ എന്നിവരെ തിരഞ്ഞെടുക്കുവാനാണ് തെരഞ്ഞെടുപ്പ് നടത്തുന്നത്. ഇതിനായി പത്ത് ‘റിട്ടേർണിംഗ് ഓഫീസർമാരെയാണ് ആക്ഷൻ കൗൺസിൽ നിയമിച്ചത്. വിവിധ രാജ്യങ്ങളിൽ നിന്നുമായി ആയിരം കോർഡിനേറ്റർമാരെയും ഇപ്പോൾ തിരഞ്ഞെടുത്തുകൊണ്ടിരിക്കുകയാണ്. കൂടാതെ വിവിധ രാജ്യങ്ങളിലെ പ്രമുഖ മലയാളി സംഘടനാ നേതാക്കളെ ഉൾപ്പെടുത്തിക്കൊണ്ട് ആക്ഷൻ കൗൺസിൽ ‘ഉപദേശക സമിതിയും’ രൂപീകരിക്കുമെന്നും ഭാരവാഹികൾ പറഞ്ഞു.
സർക്കാർ തലങ്ങളിൽ സമ്മർദ്ദം ചെലുത്തി ആവശ്യമായ കാര്യങ്ങൾ കണ്ണൂരിന് ലഭ്യമാക്കുകയാണ് വേണ്ടത്. കണ്ണൂർ എയർപോർട്ടിൽ വിദേശ രാജ്യങ്ങളുടെ വിമാനങ്ങൾ പറന്നിറങ്ങാനുള്ള അനുമതി, കേന്ദ്ര വ്യോമയാന മന്ത്രാലയം അടിയന്തിരമായി നടപ്പിലാക്കണമെന്നാണ് ആക്ഷൻ കൗൺസിൽ പ്രധാനമായും ആവശ്യപ്പെടുന്നത്. വടകര മുതൽ, കണ്ണൂർ, കാസർഗോഡ്, വയനാട് ജില്ലകളിലെ പ്രവാസികളെ സംഘടിപ്പിച്ചുകൊണ്ടാണ് ‘കണ്ണൂർ എയർപോർട്ട് ആക്ഷൻ കൗൺസിൽ’ രൂപീകരിച്ചിരിക്കുന്നത്. ആക്ഷൻ കൗൺസിലിൻ്റെ ‘നാഷണൽ കമ്മിറ്റികൾ’ വിവിധ രാജ്യങ്ങളിലും രൂപീകരിക്കാനുള്ള നടപടി ക്രമങ്ങൾ ആരംഭിച്ചതായും ആക്ഷൻ കൗൺസിലിൽ അംഗമാകുവാൻ താത്പര്യമുള്ളവർ 9315503394 എന്ന വാട്സ്ആപ്പ് നമ്പറിലേക്ക് മെസ്സേജ് അയക്കണമെന്നും ഭാരവാഹികൾ അറിയിച്ചു.
