ഇന്ത്യൻ വ്യവസായി ഗൗതം അദാനിയുടെ കമ്പനികളുടെ ഓഹരികൾ കഴിഞ്ഞ കുറച്ച് ദിവസങ്ങളായി തുടർച്ചയായി ഉയർന്നു കൊണ്ടിരിക്കുകയായിരുന്നു. അദ്ദേഹത്തിൻ്റെ ഓഹരികളുടെ വില അതിവേഗം വർദ്ധിച്ചു കൊണ്ടിരിക്കുകയും, അതേ വേഗതയിൽ അദാനിയുടെ ആസ്‌തി ഉയരുകയും ചെയ്‌തിരുന്നു. എന്നാൽ, കഴിഞ്ഞ ദിവസം അദാനി ഗ്രൂപ്പിൻ്റെ ഓഹരികൾ വീണ്ടും ഇടിവ് നേരിട്ടു, ഇത് ഇപ്പോൾ ബുധനാഴ്‌ചയും തുടരുകയാണ്.

ആസ്‌തിയിലെ ഈ ഇടിവ് മൂലം അദ്ദേഹം സമ്പന്നരുടെ പട്ടികയിൽ അഞ്ച് സ്ഥാനം താഴേക്ക് പോയിരിക്കുകയാണ്.കഴിഞ്ഞ 24 മണിക്കൂറിനുള്ളിൽ ഗൗതം അദാനിക്ക് 2.6 ബില്യൺ ഡോളറിലധികം അഥവാ ഏകദേശം 21,000 കോടി രൂപയുടെ നഷ്‌ടമുണ്ടായി. ഓഹരിയിലുണ്ടായ ഇടിവ് മൂലം ഗൗതം അദാനിയുടെ മൊത്തം മൂല്യം കുറഞ്ഞതിനാൽ അദ്ദേഹം വീണ്ടും 26-ാം സ്ഥാനത്തേക്ക് പതിച്ചിരിക്കുകയാണ്.

ഫോബ്‌സിൻ്റെ റിയൽ ടൈം ബില്യണയർ സൂചിക പ്രകാരം അദാനിയുടെ ആസ്‌തി 45.3 ബില്യൺ ഡോളറായി കുറഞ്ഞു. നീണ്ട നാളത്തെ ഇടവേളയ്ക്ക് ശേഷം സമീപ ദിവസങ്ങളിൽ ഓഹരിയിലുണ്ടായ ഉയർച്ച കാരണം അദ്ദേഹം ശതകോടീശ്വരന്മാരുടെ പട്ടികയിൽ അതിവേഗം കയറി 21-ാം സ്ഥാനത്തെത്തിയിരുന്നു.

ആഴ്‌ചയിലെ മൂന്നാം വ്യാപാര ദിനമായ ബുധനാഴ്‌ചയും അദാനി ഗ്രൂപ്പ് കമ്പനികളുടെ പല ഓഹരികളും ഇടിവ് തുടർന്നു. ചൊവ്വാഴ്‌ച നാല് സ്‌റ്റോക്കുകളിൽ അപ്പർ സർക്യൂട്ടിൽ എത്തിയ സ്ഥാനത്താണിത്. അദാനി പവർ, അദാനി ടോട്ടൽ ഗ്യാസ്, അദാനി ട്രാൻസ്‌മിഷൻ എന്നിവയ്ക്ക് തിരിച്ചടി നേരിട്ടു.