കാസർകോട് ജില്ലയിലെ കല്ലക്കട്ടയില് വന് പാന്മസാല വിദ്യാനഗർ പോലീസ് ശേഖരം പിടികൂടി. ആള്ത്താമസമില്ലാത്ത വീട്ടില് നിന്ന് ആയിരം കിലോയോളം പാന് മസാലയാണ് രഹസ്യ വിവരത്തിന്റെ അടിസ്ഥാനത്തിൽ നടന്ന പരിശോധനയിൽ പിടികൂടിയത്.
സംഭവത്തിൽ നിലവിൽ ആരേയും അറസ്റ്റ് ചെയ്തിട്ടില്ല. കല്ലക്കട്ട ബാഞ്ഞാര്മൂലയിലെ ഒറ്റപ്പെട്ട വീട്ടിലായിരുന്നു പാന്മസാല ശേഖരം സൂക്ഷിച്ചിരുന്നത്. ആയിരം കിലോയോളം തൂക്കം വരുന്ന പാൻമസാലകൾ 68 ചാക്കുകളിലായി സൂക്ഷിച്ച നിലയിലായിരുന്നു. ബദറുദ്ദീന് എന്നയാളുടെ വീടാണിതെന്ന് പൊലീസ് പറഞ്ഞു. ഇവിടെ ആള്താമസമില്ല. നിരോധിത പുകയില ഉത്പന്നങ്ങള് സൂക്ഷിക്കാനുള്ള ഗോഡൗണായി ഉപയോഗിക്കുകയായിരുന്നു ഈ കെട്ടിടം.
പരിശോധനയ്ക്കായി പൊലീസ് എത്തുമ്പോള് വീട്ടില് ആരും ഉണ്ടായിരുന്നില്ല. ഹരിയാനയില് നിര്മ്മിച്ച നിരോധിത പുകയില ഉത്പന്നങ്ങളാണ് പിടിച്ചെടുത്തവയെല്ലാം. കര്ണ്ണാടകയില് നിന്ന് കടത്തിക്കൊണ്ട് വന്നതാണെന്നാണ് നിഗമനം. വിദ്യാനഗര് പൊലീസ് വിശദമായ അന്വേഷണം ആരംഭിച്ചിട്ടുണ്ട്.
