ന്യൂഡല്ഹി: കോടതിയലക്ഷ്യക്കേസില് സുപ്രീംകോടതി ആറു മാസത്തെ തടവുശിക്ഷ വിധിച്ച കൊല്ക്കത്ത ഹൈക്കോടതി ജഡ്ജി സി.എസ് കര്ണന് സുപ്രീം കോടതിയെ സമീപിച്ചു. തനിക്കെതിരായ ഉത്തരവ് പിന്വലിക്കണമെന്നും താന് ഒളിവില് അല്ലെന്നും ചെന്നൈയിലുണ്ടെന്നും കര്ണന് കോടതിയെ അറിയിച്ചു. കോടതി ഉത്തരവ് നടപ്പാക്കാന് ചെന്നൈയിലെത്തിയ പോലീസ് സംഘത്തിന് അദ്ദേഹത്തെ ഇതുവരെ കണ്ടെത്താന് സാധിച്ചിട്ടില്ല.
സുപ്രീംകോടതിയിലെയും ഹൈക്കോടതിയിലെയും ജഡ്ജിമാര് അഴിമതിക്കാരാണെന്ന് ചൂണ്ടിക്കാണിച്ച് പ്രധാനമന്ത്രിക്കും നിയമമന്ത്രിക്കും മറ്റും കത്ത് എഴുതിയ കേസിലാണ് സുപ്രീംകോടതിയിലെ ഏഴംഗബെഞ്ച് ജസ്റ്റിസ് കര്ണനെതിരെ സ്വമേധയാ കേസെടുത്തത്. വിചാരണനടപടികളുമായി സഹകരിക്കാത്ത ജസ്റ്റിസ് കര്ണ്ണന് ചീഫ്ജസ്റ്റിസ് ഉള്പ്പടെയുള്ളവര്ക്ക് എതിരെ തുടര്ച്ചയായി ഉത്തരവുകള് പുറപ്പെടുവിച്ചതും സുപ്രീംകോടതിയെ ചൊടിപ്പിച്ചു. തുടര്ന്ന് അദ്ദേഹത്തെ കോടതിയലക്ഷ്യത്തിന് ആറുമാസം ശിക്ഷിക്കുകയായിരുന്നു.
