വയനാട് ജില്ലയിലെ ബാണാസുര സാഗര് ഡാം തുറന്നു. ജലം ഒഴുകുന്ന കബനി, മാനന്തവാടി, പനമരം പുഴയോരങ്ങളില് അതീവ ജാഗ്രതാ നിര്ദേശം പുറപ്പെടുവിച്ചിട്ടുണ്ട്. കൂടാതെ പ്രദേശത്ത് റെഡ് അലര്ട്ടും പ്രഖ്യാപിച്ചിട്ടുണ്ട്. വൈകുന്നേരം മൂന്നുമണിക്കാണ് ഷട്ടറുകള് തുറന്നത്. നാല് ഷട്ടറുകളാണ് ഡാമിനുള്ളതെങ്കിലും ഒരു ഷട്ടറാണ് ഇപ്പോള് തുറന്നത്. മഴ ശക്തമായതിനെ തുടര്ന്ന് മുന്കരുതല് നടപടിയെന്ന നിലയിലാണ് ഷട്ടര് തുറക്കുന്നത്.
അണക്കെട്ട് തുറക്കുന്നതിന് മുന്നോടിയായി തീരത്തുള്ള ആയിരത്തോളം ജനങ്ങളെ ഒഴിപ്പിച്ചുകഴിഞ്ഞു. കരമാന് കനാലിന്റെ ഇരു കരകളിലുമുള്ളവരെ മാറ്റിത്താമസിപ്പിച്ച ശേഷമാണ് ഷട്ടര് ഉയര്ത്തിയത്. നിരവധി സുരക്ഷാസംവിധാനങ്ങളാണ് ഇവിടെ ഒരുക്കിയിട്ടുള്ളത്.
അതേസമയം, ദുരിതബാധിത പ്രദേശത്ത് രക്ഷാപ്രവര്ത്തകരുടെ നിര്ദ്ദേശം പാലിക്കാന് എല്ലാവരും തയ്യാറാകണമെന്ന് മുഖ്യമന്ത്രി പിണറായി വിജയന് പറഞ്ഞു. ചിലയിടങ്ങളില് മൈക്ക് വെച്ച് വിളിച്ച് പറഞ്ഞിട്ടും ആളുകള് വീടുകളില് നിന്ന് മാറുന്നില്ലെന്ന് മന്ത്രി ഇ.പി ജയരാജനും പറഞ്ഞു. വീടിനോടുള്ള വൈകാരിക ബന്ധം കാരണം പലരും മാറാന് മടിക്കുകയാണ്, ഈ സ്ഥിതി മാറണമെന്നും മന്ത്രി പറഞ്ഞു.
