മദ്യപിച്ച് വനിത പ്രവര്ത്തകരെ അപമാനിക്കാന് ശ്രമിക്കുകയും അസഭ്യം പറയുകയും ചെയ്തുവെന്ന് കാണിച്ച് ജോജുവിനെതിരെ പരാതി നല്കിയ പരാതിയില് കഴമ്പില്ല എന്ന് പോലീസ് കണ്ടെത്തിയതോടെ കോണ്ഗ്രസിൻ്റെ അനുരഞ്ജന നീക്കം. ജോജുവിൻ്റെ സുഹൃത്തുക്കള് കോണ്ഗ്രസ് നേതാക്കളുമായി സംസാരിച്ചെന്നും പ്രശ്നങ്ങള് പരസ്പരം സംസാരിച്ച് തീര്ക്കാന് തീരുമാനിച്ചുവെന്നുമാണ് ഡി.സി.സി അധ്യക്ഷന് മുഹമ്മദ് ഷിയാസ് പറയുന്നത്.
പെട്ടെന്ന് ഇരുകൂട്ടരുടെയും ഭാഗത്ത് നിന്നുമുണ്ടായ പ്രകോപനമാണ് വാക്കേറ്റത്തിലേക്കും പ്രശ്നങ്ങളിലേക്കും നയിച്ചതെന്ന് മുഹമ്മദ് ഷിയാസ് പറഞ്ഞു. എറണാകുളം എം.പി ഹൈബി ഈഡന് ഉള്പ്പെടെയുള്ള നേതാക്കള് ഇടപെട്ടാണ് വിഷയത്തില് പ്രശ്ന പരിഹാരത്തിന് മുന്കൈയെടുത്തത്. മനുഷ്യസഹജമായ പ്രശ്നങ്ങളാണ് ഉണ്ടായതെന്നും ഇതില് പരിഹരിക്കപ്പെടാന് കഴിയാത്ത കാര്യങ്ങള് ഒന്നും തന്നെയില്ലെന്നും ഡി.സി.സി അധ്യക്ഷന് പറഞ്ഞു.
തിങ്കളാഴ്ച എറണാകുളത്ത് ഇടപ്പള്ളി മുതല് വൈറ്റില വരെ റോഡ് ഉപരോധിച്ചുള്ള സമരത്തില് ഗതാഗതക്കുരുക്കുണ്ടായിരുന്നു. ഇതില് പ്രതിഷേധിച്ചാണ് നടന് ജോജു സമരത്തെ ചോദ്യം ചെയ്തത്. ജോജുവിൻ്റെ ഇടപെടലില് പ്രകോപിതരായ കോണ്ഗ്രസ് പ്രവര്ത്തകര് നടൻ്റെ വാഹനം അടിച്ച് തകര്ത്തിരുന്നു. ജോജുവിൻ്റെ പരാതിയില് കൊച്ചി മുന് മേയര് ടോണി ചമ്മിണി ഉള്പ്പെടെയുള്ള 15 കോണ്ഗ്രസ് നേതാക്കള്ക്കെതിരേയും 50 പ്രവര്ത്തകര്ക്കെതിരേയും പോലീസ് കേസെടുത്തിരുന്നു.
