2024ലെ പൊതുതിരഞ്ഞെടുപ്പില് ബി.ജെ.പിയെ നേരിടാന് എട്ട് കോണ്ഗ്രസ് ഇതര മുഖ്യമന്ത്രിമാരുടെ സംഘം രൂപീകരിക്കാനുള്ള വേദി ഒരുങ്ങുകയാണെന്ന് ഡല്ഹി മുഖ്യമന്ത്രി അരവിന്ദ് കെജ്രിവാള് പറഞ്ഞു. എന്നാല്, ഇത് 2024ലെ മുന്നണിയല്ലെന്നും ഭരണത്തിൻ്റെ വേദിയാണെന്നും മുഖ്യമന്ത്രി പറഞ്ഞു.
സംഘത്തില് ഡല്ഹി മുഖ്യമന്ത്രി അരവിന്ദ് കെജ്രിവാള്, പഞ്ചാബ് മുഖ്യമന്ത്രി ഭഗവന്ത് മാന്, തമിഴ്നാട് മുഖ്യമന്ത്രി എം.കെ സ്റ്റാലിന്, കേരള മുഖ്യമന്ത്രി പിണറായി വിജയന്, ബംഗാള് മുഖ്യമന്ത്രി മമത ബാനര്ജി, ജാര്ഖണ്ഡ് മുഖ്യമന്ത്രി ഹേമന്ത് സോറന്, ബിഹാര് മുഖ്യമന്ത്രി നിതീഷ് കുമാര്, തെലങ്കാന മുഖ്യമന്ത്രി കെ. ചന്ദ്രശേഖര് റാവു എന്നിവരാണ് ഉള്ളത്.
‘ഇന്ന് ഞാന് ഇത് പ്രഖ്യാപിക്കാന് പ്രോട്ടോക്കോള് ലംഘിക്കുകയാണ്, കാരണം എട്ട് മുഖ്യമന്ത്രിമാര് ഒരുമിച്ച് പത്രസമ്മേളനം നടത്തേണ്ടതായിരുന്നു. എല്ലാ മാസവും എട്ട് സംസ്ഥാനങ്ങളിലൊന്നിലേക്ക് പോകാനും അവിടെ നടക്കുന്ന നല്ല പ്രവര്ത്തനങ്ങള് കാണാനും അത് നമ്മുടെ സംസ്ഥാനങ്ങളില് നടപ്പാക്കാനും ഞങ്ങള് എല്ലാവരും തീരുമാനിച്ചിട്ടുണ്ട്, ”കെജ്രിവാള് പറഞ്ഞു.
‘എന്നാല് ഇത് 2024-ലേക്കുള്ള ഒരു മുന്നണിയല്ല. ഇതൊരു ഭരണ പ്ലാറ്റ്ഫോമാണ്. ഞങ്ങള് പണ്ട് കെ.സി.ആറിൻ്റെ തെലങ്കാനയില് പോയിരുന്നു. തെലങ്കാനയിലെ ജനസംഖ്യ ഏകദേശം നാല് കോടിയോളമാണ്, എല്ലാവര്ക്കും സംസ്ഥാനത്ത് സൗജന്യ നേത്രപരിശോധന നടക്കുന്നു. അതുപോലെ, ഡല്ഹിയിലും ഞങ്ങള് ഈ പദ്ധതി പ്രഖ്യാപിച്ചു. പരസ്പരം പഠിക്കാനുള്ള ഭരണത്തിൻ്റെ വേദിയാണിത്. കെജ്രിവാള് പറഞ്ഞു.
പരസ്പരം പഠിക്കുക എന്നതാണ് ആശയം, ഇതുമായി ബന്ധപ്പെട്ട് നിരവധി റൗണ്ട് ചര്ച്ചകള് നടന്നിട്ടുണ്ടെന്നും അദ്ദേഹം പറഞ്ഞു. എല്ലാ സംസ്ഥാനങ്ങളിലും നിയമസഭാ സമ്മേളനങ്ങള് നടക്കുന്നതിനാല്, ഏപ്രില് പകുതിക്ക് ശേഷം മുഖ്യമന്ത്രിമാര് യോഗം ചേരാന് സമ്മതിച്ചതായും അദ്ദേഹം കൂട്ടിച്ചേര്ത്തു.
