സ്ത്രീകളുടെ ജീവന് ഭീഷണി ആയേക്കാവുന്ന 12 രോഗങ്ങള്‍; ഇവ അറിയാതെ പോകരുത്

സമൂഹത്തിൻ്റെ അടിസ്ഥാന ഘടകമായ ‘കുടുംബത്തിൻ്റെ’ ആണിക്കല്ലാണ് സ്ത്രീ. സ്ത്രീകളുടെ ആരോഗ്യം മുഴുവന്‍ കുടുംബത്തിൻ്റെയും അടിസ്ഥാനമാണ്. എന്നാല്‍ പലപ്പോഴും കുടുംബത്തിലുള്ളവരും സ്ത്രീകള്‍ തന്നെയും അവരുടെ ആരോഗ്യത്തിന് മുന്‍ഗണന നല്‍കാറില്ല. ഒരു മെഡിക്കല്‍ എമര്‍ജന്‍സി ഇല്ലെങ്കില്‍ വിദ്യാസമ്പന്നരായ സ്ത്രീകള്‍ പോലും അവരുടെ ആരോഗ്യകാര്യങ്ങള്‍ക്ക് യാതൊരു പരിഗണനയും നല്‍കാറില്ല. എന്നാല്‍ സ്ത്രീകളുടെ ആരോഗ്യ പ്രശ്നങ്ങള്‍ പുരുഷന്മാരില്‍ നിന്ന് വ്യത്യസ്തമാണ്. സ്ത്രീകളുടെ ജീവിതത്തിലെ ഓരോ പത്ത് വര്‍ഷത്തിലോ ഇരുപത് വര്‍ഷത്തിലോ അവരുടെ ശരീരത്തിലെ ഹോര്‍മോണ്‍ മാറ്റങ്ങളുള്‍പ്പെടെയുള്ളവയാല്‍ ഉണ്ടാകുന്ന ആരോഗ്യ പ്രശ്നനങ്ങള്‍ വിലയിരുത്തുകയും ആവശ്യമെങ്കില്‍ ചികിത്സ തേടുകയും വേണം.

കൗമാരപ്രായമാണ് പെണ്‍കുട്ടികളുടെ ശരീരത്തില്‍ ഉണ്ടാകുന്ന ആദ്യത്തെ പ്രധാന മാറ്റം. ഇത് എല്ലാ പെണ്‍കുട്ടികള്‍ക്കും ബുദ്ധിമുട്ടുള്ള ഒരു കാലഘട്ടമാണ്. ഇത് മാറ്റത്തിൻ്റെയും ദ്രുതഗതിയിലുള്ള വളര്‍ച്ചയുടെയും കാലഘട്ടമാണ്. ഉയരം, ഭാരം, ഹോര്‍മോണ്‍ മാറ്റങ്ങള്‍ എന്നിവയെല്ലാം ജീവിതത്തിലെ ഈ പത്ത് വര്‍ഷത്തിനുള്ളില്‍ സംഭവിക്കുന്നു.

പൊതുവില്‍ സ്ത്രീകളുടെ ജീവന് തന്നെ അപകടകരം ആയേക്കാവുന്നതും എന്നാല്‍ മാരകമാകുവോളം ശ്രദ്ധിക്കപെടാത്തതുമായ പന്ത്രണ്ട് രോഗാവസ്ഥകൾ ഇവയാണ്.

അനീമിയ

കൗമാരക്കാരായ പെണ്‍കുട്ടികളില്‍ കണ്ടുവരുന്ന ഒരു സാധാരണ പ്രശ്നമാണ് അനീമിയ അഥവാ വിളര്‍ച്ച. മോശം ഭക്ഷണ രീതി, പോഷകങ്ങള്‍ കുറഞ്ഞ ഭക്ഷണ ശീലങ്ങള്‍ എന്നിവയാണ് ഇതിന് പ്രധാന കാരണം. അയണ്‍, വിറ്റാമിന്‍ സി, ഫോളേറ്റ് എന്നിവ അടങ്ങിയ ഭക്ഷണങ്ങള്‍ വിളര്‍ച്ച ഒഴിവാക്കാന്‍ സഹായിക്കും. ഇരുമ്പ് അടങ്ങിയ ഭക്ഷണങ്ങളില്‍ കോഴിയിറച്ചി, ബീന്‍സ്, ഇലക്കറികള്‍, ഡ്രൈ ഫ്രൂട്ട്സ് എന്നിവ ഉള്‍പ്പെടുന്നു. സിട്രസ് പഴങ്ങള്‍, പപ്പായ, കുരുമുളക്, ചീര എന്നിവയില്‍ വിറ്റാമിന്‍ സി ധാരാളമുണ്ട്. ധാന്യങ്ങള്‍, ഇലക്കറികള്‍, മുട്ട, നിലക്കടല, വിത്തുകള്‍ എന്നിവയില്‍ നിന്ന് ശരീരത്തിന് ആവശ്യമായ ഫോളേറ്റ് ലഭിക്കും.

ഭക്ഷണ ക്രമക്കേടുകള്‍

കൗമാരപ്രായം പെണ്‍കുട്ടികളെ അവരുടെ രൂപത്തെ കുറിച്ച്‌ ചിന്തിക്കാന്‍ പ്രേരിപ്പിക്കുന്ന ഘട്ടമാണ്. ശരീരത്തിൻ്റെ ആകൃതിയും വലിപ്പവും, ചര്‍മ്മപ്രശ്‌നങ്ങളും എല്ലാം ഹോര്‍മോണ്‍ വ്യതിയാനങ്ങളുടെ ഭാഗമായി ഉണ്ടാകുന്ന സാധാരണ കാര്യങ്ങളാണ്. ഈ സമയത്ത് ആരോഗ്യകരമായ ശരീരഭാരത്തിനും ചര്‍മ്മത്തിനും പോഷക സമൃദ്ധമായ ഭക്ഷണം ആവശ്യമാണ്. ധാരാളം പഴങ്ങളും പച്ചക്കറികളും ഭക്ഷണത്തില്‍ ഉള്‍പ്പെടുത്തുന്നത് ചര്‍മ്മത്തിൻ്റെ തിളക്കം നിലനിര്‍ത്താന്‍ സഹായിക്കും. ധാന്യങ്ങള്‍ കഴിക്കുന്നത് കുടലിനെ ആരോഗ്യകരമായി നിലനിര്‍ത്തുന്ന നാരുകള്‍ ലഭ്യമാക്കും.

പോളിസിസ്റ്റിക് ഓവറി സിന്‍ഡ്രോം (പി.സി.ഒ.എസ്) / പോളിസിസ്റ്റിക് ഓവറി ഡിസീസ് (പി.സി.ഒ.ഡി)

ഈ രോഗം മിക്കവാറും ഗര്‍ഭധാരണത്തിനും മറ്റും തടസങ്ങള്‍ നേരിടുമ്പോഴാണ് പൊതുവെ കണ്ടെത്താറുള്ളത്. ഇത് ഒരു ഹോര്‍മോണ്‍ അസന്തുലിതാവസ്ഥയാണ്. അമിതവണ്ണം, ഇന്‍സുലിന്‍ റെസിസ്റ്റന്‍സ് എന്നിവയാണ് സാധാരണ പാര്‍ശ്വഫലങ്ങള്‍. കാര്‍ബോഹൈഡ്രേറ്റ്, മധുരമുള്ള ഭക്ഷണം, സംസ്‌കരിച്ച ഭക്ഷണങ്ങള്‍ എന്നിവ ഒഴിവാക്കേണ്ടത് ആവശ്യമാണ്. ധാന്യങ്ങളും പയര്‍വര്‍ഗ്ഗങ്ങളും ഇന്‍സുലിന്‍ റെസിസ്റ്റന്‍സ് തടയാന്‍ സഹായിക്കുന്നു. കൃത്യമായ ഭക്ഷണരീതികളും നേരത്തെ അത്താഴം കഴിക്കുന്നതും കൊഴുപ്പ് കുറയ്ക്കാന്‍ സഹായിക്കുന്നു. പഴങ്ങളും അണ്ടിപ്പരിപ്പുകളും വിത്തുകളും കഴിക്കുന്നത് ശരീരത്തിലെ പഞ്ചസാരയുടെ അളവ് നിയന്ത്രിക്കാന്‍ സഹായിക്കുന്നു. മുടങ്ങാതെയുള്ള വ്യായാമവും അത്യാവശ്യമാണ്.

അസ്ഥികളുടെ ആരോഗ്യം

സ്ത്രീകളിലെ അസ്ഥികളുടെ ആരോഗ്യം 30കളില്‍ കുറയാന്‍ തുടങ്ങും. മതിയായ അളവില്‍ കാല്‍സ്യം കഴിക്കുന്നതിനൊപ്പം വ്യായാമം ചെയ്യേണ്ടത് വളരെ അത്യാവശ്യമാണ്. കാല്‍സ്യത്തിൻ്റെ ഏറ്റവും മികച്ച ഉറവിടമാണ് പാലുല്‍പ്പന്നങ്ങള്‍. ദിവസവും 500 മില്ലി പാല്‍, പനീര്‍, എന്നിവ കഴിക്കണം. വെജിറ്റേറിയന്‍ സോയാ മില്‍ക്ക് തിരഞ്ഞെടുക്കാം. ഇവ എല്ലുകളുടെ വളര്‍ച്ചയ്ക്ക് ആവശ്യമായ പ്രോട്ടീനും ഫോസ്‌ഫറസും നല്‍കുന്നു. സ്ത്രീകള്‍ക്ക് 40നും 50നും ഇടയില്‍ പ്രായമാകുമ്പോള്‍ ശാരീരിക പ്രവര്‍ത്തനങ്ങള്‍ കൂടുതല്‍ മന്ദഗതിയിലാകും. കൂടുതല്‍ ആരോഗ്യകരമായ ജീവിതത്തിന് ശ്രദ്ധ നല്‍കേണ്ട നിര്‍ണായക സമയമാണിത്.

ശരീരഭാരം

സ്ത്രീകള്‍ക്ക് പുരുഷന്മാരേക്കാള്‍ കൊഴുപ്പ് കൂടുതലാണ്. ഇത് പ്രായമാകുമ്പോള്‍ ഉയര്‍ന്ന രക്തസമ്മര്‍ദ്ദം, ഹൃദയ സംബന്ധമായ അസുഖങ്ങള്‍, പ്രമേഹം തുടങ്ങിയ രോഗങ്ങള്‍ക്കുള്ള സാധ്യത വര്‍ദ്ധിപ്പിക്കുന്നു. ശരീരഭാരം നിയന്ത്രിക്കാനും പേശി ബലപ്പെടുത്താനും ദിവസവും വ്യായാമം ചെയ്യേണ്ടത് അത്യാവശ്യമാണ്. ചിക്കന്‍, മുട്ട, പാലുല്‍പ്പന്നങ്ങള്‍, പയറുവര്‍ഗ്ഗങ്ങള്‍ എന്നിവയില്‍ നിന്ന് ആവശ്യമായ പ്രോട്ടീനുകള്‍ ലഭിക്കും. പ്രഭാത ഭക്ഷണം ഒരിക്കലും ഒഴിവാക്കരുത്. ജലാംശത്തിനായി ധാരാളം വെള്ളവും കലോറി രഹിത പാനീയങ്ങളും കുടിക്കുക. കൂടുതല്‍ സസ്യാഹാരം കഴിക്കുന്നതും മാംസാഹാരം കുറയ്ക്കുന്നതും ശരീരഭാരം നിലനിര്‍ത്താന്‍ സഹായിക്കും.

ആര്‍ത്തവ വിരാമം

സ്ത്രീകളില്‍ സംഭവിക്കുന്ന ഒരു പ്രധാന ഹോര്‍മോണ്‍ വ്യതിയാനമാണ് ആര്‍ത്തവ വിരാമം. സ്ത്രീ ഹോര്‍മോണായ ഈസ്ട്രജന്‍ കുറയുന്നതിനനുസരിച്ച്‌ ഹൃദ്രോഗങ്ങള്‍ക്കെതിരായ പ്രവര്‍ത്തനവും കുറയുന്നു. രോഗങ്ങളെ കുറിച്ചുള്ള ബോധവല്‍ക്കരണം ഈ സമയത്ത് ആവശ്യമാണ്.

ഹൃദ്രോഗം

ആര്‍ത്തവ വിരാമത്തോടെ, കൊളസ്ട്രോള്‍ വര്‍ദ്ധനവ്, രക്തക്കുഴലുകളുടെ ഭിത്തികളില്‍ ഉണ്ടാകുന്ന മാറ്റങ്ങള്‍ എന്നിവ ഹൃദ്രോഗ സാധ്യത വര്‍ദ്ധിപ്പിക്കുന്നു. ധാന്യങ്ങള്‍, പയറുവര്‍ഗ്ഗങ്ങള്‍, പച്ചക്കറികളും പഴങ്ങളും, പരിപ്പ്, ആരോഗ്യകരമായ കൊഴുപ്പുകള്‍ എന്നിവ ഹൃദ്രോഗങ്ങളില്‍ നിന്ന് സംരക്ഷിക്കാന്‍ സഹായിക്കുന്നു. നാരുകള്‍ കൂടുതലുള്ള ഭക്ഷണം കഴിക്കുന്നതും 30- 40 മിനിറ്റ് വ്യായാമവും ഹൃദ്രോഗം തടയാന്‍ സഹായിക്കും.

പ്രമേഹം

ആര്‍ത്തവ വിരാമം നേരിട്ട് പ്രമേഹത്തിന് കാരണമാകില്ലെങ്കിലും, ഹോര്‍മോണ്‍ മാറ്റങ്ങള്‍ ശരീരഭാരം വര്‍ദ്ധിപ്പിക്കുകയും അതുമൂലമുണ്ടാകുന്ന രക്തസമ്മര്‍ദ്ദത്തിൻ്റെ വര്‍ദ്ധനവ് പ്രമേഹ സാധ്യത വേഗത്തിലാക്കുകയും ചെയ്തേക്കാം. കാര്‍ബോ ഹൈഡ്രേറ്റുകളും നാരുകളും അടങ്ങിയ സസ്യാധിഷ്ഠിത ഭക്ഷണത്തോടൊപ്പം ശരിയായ സമയത്ത് ശരിയായ അളവില്‍ സമീകൃതാഹാരം കഴിക്കാന്‍ ശ്രദ്ധിക്കുക. വ്യായാമവും അത്യാവശ്യമാണ്.

ഉഷ്ണം

ആര്‍ത്തവ വിരാമ സമയത്ത് സ്ത്രീകളില്‍ സാധാരണയായി കാണപ്പെടുന്ന ഒന്നാണ് ഉഷ്‌ണം. എന്നാല്‍ വെജിറ്റേറിയന്‍ ഭക്ഷണം കഴിക്കുന്ന സ്ത്രീകള്‍ക്ക് രോഗലക്ഷണങ്ങള്‍ കുറവായിരിക്കും. സോയ, സോയ ഉല്‍പ്പന്നങ്ങള്‍, ഓട്‌സ്‌, ബാര്‍ലി, കാരറ്റ്, ആപ്പിള്‍, എള്ള്, ഗോതമ്പ്, ബീന്‍സ്, എന്നിവ ആരോഗ്യത്തിന് വളരെ നല്ലതാണ്. സ്ത്രീകള്‍ അവരുടെ 60കളിലും 70കളിലും പ്രവേശിക്കുമ്പോള്‍ അവരുടെ മാനസികവും ശാരീരികവുമായ ആരോഗ്യം നിലനിര്‍ത്തേണ്ടത് നിര്‍ണായകമാണ്. രോഗങ്ങള്‍ തടയുന്നതിന് വര്‍ഷത്തിലൊരിക്കല്‍ ആരോഗ്യ പരിശോധന വളരെ പ്രധാനമാണ്.

മാനസികാരോഗ്യം

വിഷാദവും ഉത്കണ്ഠയും സ്ത്രീകളിലെ സുവര്‍ണ്ണ കാലഘട്ടത്തിലെ സാധാരണ പ്രശ്നങ്ങളാണ്. ആന്റി ഓക്‌സിഡണ്ടുകളാല്‍ സമ്പന്നമായ ഭക്ഷണങ്ങള്‍ തലച്ചോറിലെ കോശങ്ങളെ സംരക്ഷിക്കാന്‍ സഹായിക്കുന്നു. നിങ്ങളുടെ ഭക്ഷണത്തില്‍ പഴങ്ങളും പച്ചക്കറികളും ഉള്‍പ്പെടുത്തുന്നത് ആന്റി ഓക്‌സിഡണ്ട് സമ്പുഷ്ടമായ ഭക്ഷണങ്ങള്‍ ഉള്‍പ്പെടുത്തുന്നതിനുള്ള മികച്ച മാര്‍ഗമാണ്. ആവശ്യത്തിന് കാര്‍ബോ ഹൈഡ്രേറ്റ് കഴിക്കുന്നത് തലച്ചോറിനെ പുഷ്ടിപ്പെടുത്താന്‍ സഹായിക്കുന്നു.

ബലഹീനത

വിശപ്പില്ലായ്‌മ കാരണം ബലഹീനത ഉണ്ടാകാം. ആവശ്യത്തിന് പ്രോട്ടീന്‍ കഴിക്കുന്നത് പേശികളുടെ ശക്തി നിലനിര്‍ത്താന്‍ സഹായിക്കും. ആവശ്യമെങ്കില്‍ പ്രോട്ടീന്‍ സപ്ലിമെണ്ട് എടുക്കുന്നതിനെ കുറിച്ച്‌ ഒരു ആരോഗ്യ വിദഗ്‌ധൻ്റെ ഉപദേശം തേടാവുന്നതാണ്. ആവശ്യത്തിന് ജലാംശം ശരീരത്തില്‍ നിലനിര്‍ത്തണം. അതിനാല്‍ വൈകുന്നേരം ആറ് മണിക്ക് മുമ്പ് പരമാവധി വെള്ളം കുടിക്കുക.

മലബന്ധം

മോശം ഭക്ഷണ ശീലങ്ങള്‍, ഭക്ഷണം ഒഴിവാക്കല്‍, അല്ലെങ്കില്‍ ദഹന പ്രശ്നങ്ങള്‍ എന്നിവ കാരണം മലബന്ധം ഉണ്ടാകാം. നാരുകള്‍ അടങ്ങിയ ഭക്ഷണങ്ങള്‍ ശരിയായ അളവില്‍ കഴിക്കുന്നതും പഴങ്ങളും പച്ചക്കറികളും ധാന്യങ്ങളും കഴിക്കുന്നതും കുടലിൻ്റെ ആരോഗ്യം നിലനിര്‍ത്താന്‍ സഹായിക്കും. നടത്തം പോലുള്ള വ്യായാമങ്ങളും ഗുണകരമാണ്.