ജിദ്ദ: തെക്കൻ അറേബ്യയിൽ ആഞ്ഞുവീശുന്ന മെകുനു ചുഴലിക്കാറ്റിനെ നേരിടാൻ സൗദി സജ്ജമായി. വരും ദിവസങ്ങളിൽ മഴക്കും വെള്ളപ്പൊക്കത്തിനും സാധ്യതയുണ്ടെന്നാണ്​ കാലാവസ്​ഥ നിരീക്ഷണ നിരീക്ഷണ കേന്ദ്രത്തി​ൻ്റെ വിലയിരുത്തൽ. ജനറൽ അതോറിറ്റി ഒാഫ്​ മീറ്റീറോളജിയുടെ മുന്നറിയിപ്പിൻ്റെ അടിസ്​ഥാനത്തിൽ വേണ്ട കരുതൽ നടപടികൾ സ്വീകരിച്ചതായി നജ്​റാൻ സിവിൽ ഡിഫൻസ്​ വക്​താവ്​ കാപ്​റ്റൻ അബ്​ദുൽ ഖാലിക്​ അലി അൽ ഖഹ്​താനി അറിയിച്ചു. ദേശീയ പ്രകൃതി ദുരന്ത മാനദണ്ഡ പ്രകാരമുള്ള ഉയർന്ന നിലയിലുള്ള മുന്നൊരുക്കങ്ങളാണ്​ ഇവിടെ സ്വീകരിച്ചിട്ടുള്ളത്​.റിയാദിന്​ വടക്ക്​ ഭാഗത്തെ ആശുപത്രികൾക്ക്​ ആരോഗ്യ ഡയറക്​ട്രേറ്റ്​ കഴിഞ്ഞ ദിവസം അടിയന്തിര ജാഗ്രതാ നിർദേശം നൽകിയിരു​ന്നു​. ഹൂത ബനീ തമീം, ഹരീഖ്​, അഫ്​ലാജ്​, സുലൈൽ, വാദിദവാസിർ എന്നിവിടങ്ങളിലെ ആശുപത്രികളിലെ അടിയന്തിര, ദുരന്തനിവാരണ, ആംബുലൻസ്​ സേവന വകുപ്പുകളോട്​ ജാഗ്രതപുലർത്താൻ ആവശ്യപ്പെട്ടിട്ടുണ്ട്​.