കൊച്ചി: മമ്മൂട്ടി പുതിയ വേഷപകര്ച്ചയിലെത്തുന്ന ചിത്രം ‘ദി ഗ്രേറ്റ് ഫാദറി’ന്റെ ഒരു ഭാഗം പുറത്ത്. ചിത്രത്തിന്റെ ഒരു മിനിറ്റും ഏഴ് സെക്കന്റും നീളുന്ന ഭാഗമാണ് സമൂഹ മാധ്യമങ്ങളില് പ്രചരിക്കുന്നതായി കണ്ടെത്തിയത്. മമ്മൂട്ടി ഫാന്സും പ്രേക്ഷകരും വളരെ അധികം ആകാംഷയോടെ കാത്തിരിക്കുന്ന ചിത്രത്തില് മമ്മൂട്ടിയും സ്നേഹയും തമ്മിലെ അതിനിര്ണ്ണായക രംഗമാണ് പുറത്തായിട്ടുള്ളത്. സെന്സര് ചെയ്യുന്നതിന് മുന്പ് ചിത്രത്തിന്റെ ഭാഗങ്ങള് പുറത്തുവരാന് പാടില്ലെന്നാണ് ചട്ടം. നിര്മ്മാതാക്കള് പോലീസില് പരാതി നല്കി.
ചിത്രം മാര്ച്ച് 30-നാണ് തീയറ്ററുകളില് എത്തുന്നത്. നവാഗതനായ ഹനീഫ് അദേനിയാണ് ഈ ആക്ഷന് ത്രില്ലര് സംവിധാനം ചെയ്യുന്നത്. സ്നേഹയാണ് ചിത്രത്തില് മമ്മൂട്ടിയുടെ നായിക. ആഗസ്റ്റ് സിനിമയുടെ ബാനറില് നടന് പൃഥ്വിരാജ് സുകുമാരന്, സന്തോഷ് ശിവന്, ഷാജി നടേശന്, ആര്യ എന്നിവര് ചേര്ന്നാണ് ചിത്രം നിര്മ്മിച്ചിരിക്കുന്നത്. തമിഴ് നടന് ആര്യ പ്രധാനവേഷത്തിലെത്തുന്നു. ലിജോ ജോസ് പെല്ലിശ്ശേരി സംവിധാനം ചെയ്ത ഡബിള് ബാരലിന് ശേഷം ആര്യ അഭിനയിക്കുന്ന മലയാള ചിത്രം കൂടിയാണ് ദി ഗ്രേറ്റ് ഫാദര്. ഡേവിഡ് നൈനാന് എന്ന കേന്ദ്ര കഥാപാത്രത്തെയാണ് ചിത്രത്തില് മമ്മൂട്ടി അവതിരിപ്പിക്കുന്നത്. ഷാം , മാളവിക, ഐ.എം വിജയന്, മണികണ്ഠന് എന്നിവരാണ് മറ്റുതാരങ്ങള്.
