പത്തനംതിട്ട: കേരളത്തിൽ റോഡപകടം കൂടിവരുന്നു. പത്തനംതിട്ടയിൽ ബസും കാറും കൂട്ടിയിടിച്ച് ഒരു കുടുംബത്തിലെ 4 പേര്ക്ക് ദാരുണാന്ത്യം. കൂടൽമുറിഞ്ഞകല്ലിൽ ശബരിമല തീർത്ഥാടകർ സഞ്ചരിച്ച ബസും കാറും കൂട്ടിയിടിച്ചാണ് അപകടമുണ്ടായത്. കാറിലുണ്ടായിരുന്ന മല്ലശ്ശേരി സ്വദേശികളായ മത്തായി ഈപ്പൻ, അനു, നിഖില്, ബിജു പി ജോര്ജ് എന്നിവരാണ് മരിച്ചത്. പുലർച്ചെ 5 മണിയോടെയാണ് അപകടമുണ്ടായത്. മലേഷ്യയിലുണ്ടായിരുന്ന മകള് അനുവിനെ തിരുവനന്തപുരം എയർപോർട്ടിൽ നിന്ന് വിളിച്ചുകൊണ്ട് വരികയായിരുന്നു ഇവര്. ഒരു കുടുംബത്തിലെ 4 പേര്ക്കാണ് ദാരുണാന്ത്യം സംഭവിച്ചിരിക്കുന്നത്. അനുവിന്റെ ഭര്ത്താവാണ് നിഖില്. നിഖിലിന്റെ അച്ഛനാണ് മത്തായി ഈപ്പന്, അനുവിന്റെ അച്ഛനാണ് ബിജു പി ജോര്ജ്. ഇവരില് അനു ഒഴികെ ബാക്കിയുള്ളവര് സംഭവ സ്ഥലത്ത് വെച്ച് തന്നെ മരിച്ചു. അനുവിനെ നാട്ടുകാര് കോന്നി താലൂക്ക് ആശുപത്രിയിലെത്തിച്ചിരുന്നു. ആശുപത്രിയില് വെച്ചാണ് അനുവിന്റെ മരണം സ്ഥിരീകരിച്ചത്. പുനലൂർ മൂവാറ്റുപുഴ സംസ്ഥാന പാതയിലാണ് അപകടം ഉണ്ടായത്. ആന്ധ്രാ സ്വദേശികളായ തീർത്ഥാടകരുടെ ബസുമായി കൂട്ടിയിടിക്കുകയായിരുന്നു. അപകടത്തിൽ മാരുതി സ്വിഫ്റ്റ് കാർ പൂർണ്ണമായും തകർന്നു. കാർ വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. കാറിലുണ്ടായിരുന്ന 3 പേർ സംഭവസ്ഥലത്ത് തന്നെ വെച്ച് മരിച്ചു. സ്ഥിരം അപകടമേഖലയാണെന്ന് നാട്ടുകാര് പറയുന്നു. വാഹനത്തിന്റെ അമിത സ്പീഡും ഉറങ്ങിപ്പോകാനുള്ള സാധ്യതയുമായിരിക്കാം അപകടകാരണമെന്നാണ് പോലീസിന്റെ വിലയിരുത്തൽ. അതേസമയം ഈ അടുത്തിടെ കേരളത്തിലുണ്ടായിരിക്കുന്ന അപകടങ്ങളിൽ നിരവധിപേർക്കാണ് ജീവൻ നഷ്ടമായിരിക്കുന്നത്. വളവും തിരിവും വീതികുറഞ്ഞതുമായ റോഡ് നിർമ്മാണത്തിലെ അപാകതയാണ് പ്രധാന വില്ലൻ. ഇത് പരിഹരിച്ചാൽ തന്നെ പരമാവധി അപകടങ്ങൾ തടയാനാകും എന്നതാണ് യാഥാർഥ്യം.
