കണ്ണൂർ: ചരിത്രത്തിലാദ്യമായി തലസ്ഥാന ജില്ലക്ക് പുറത്ത് ബുധനാഴ്ച സംസ്ഥാന മന്ത്രിസഭാ യോഗം. നവംബർ 22ന് തലശ്ശേരിയിൽ ആണ് തുടക്കം. തുടർച്ചയായി അഞ്ചാഴ്ച, അഞ്ച് ജില്ലകളിലായി, ഇത്തരത്തിൽ യോഗങ്ങൾ ചേരും. തലശ്ശേരി (നവംബർ 22), മലപ്പുറത്തെ വള്ളിക്കുന്ന് (നവംബർ 28), തൃശൂർ (ഡിസംബർ 6), പീരുമേട് (ഡിസംബർ 12), കൊല്ലം (ഡിസംബർ 20) എന്നിവിടങ്ങളിലാണ് മന്ത്രിസഭാ യോഗം.
ഇടത് സർക്കാരിൻ്റെ ഏഴു വർഷത്തെ നേട്ടങ്ങൾ അടിവരയിടുന്നതിനും, പരാതി പരിഹാരത്തിനുമായി സർക്കാർ ആവിഷ്കരിച്ച നവകേരള സദസിൻ്റെ ഭാഗമായി മുഖ്യമന്ത്രിയും മന്ത്രിമാരും ജില്ലകളിൽ പര്യടനം നടത്തുന്ന സാഹചര്യത്തിലാണ് ഈ വേദികളിൽ മന്ത്രിസഭകൾ നടക്കുക.
ക്യാബിനറ്റ് മീറ്റിംഗുകൾ അതിൻ്റെ നിയുക്ത സ്ഥലത്തിനും പുറത്ത് നടത്തുന്ന ആശയം പുതിയതല്ലെങ്കിലും, സംസ്ഥാന തലസ്ഥാനത്തിന് പുറത്ത് തുടർച്ചയായി അഞ്ച് മന്ത്രിസഭാ യോഗങ്ങൾ നടക്കുന്നത് ഇതാദ്യമാണ്.
പരിപാടിയുടെ ക്രമീകരണങ്ങൾ വിലയിരുത്തുന്നതിനായി മുഖ്യമന്ത്രി ജില്ലാ കളക്ടർമാരുമായും ജില്ലയിലെ മുതിർന്ന ഉദ്യോഗസ്ഥരുമായും ബാച്ചുകളായി അവലോകന യോഗങ്ങൾ നടത്തിയിരുന്നു.
മന്ത്രിസഭാ യോഗങ്ങളിൽ പരിഗണിക്കുന്ന ബന്ധപ്പെട്ട വകുപ്പിൻ്റെ കാര്യങ്ങൾക്ക് അനുസരിച്ച് മുതിർന്ന ഉദ്യോഗസ്ഥർക്കൊപ്പം ബന്ധപ്പെട്ട വകുപ്പ് സെക്രട്ടറിയും മന്ത്രിസഭായോഗം നടക്കുന്ന വേദിയിലേക്ക് പോകേണ്ടിവരും. ഒരു വകുപ്പിൻ്റെ നിർദ്ദേശം പരിഗണിക്കുമ്പോൾ എന്തെങ്കിലും വ്യക്തതകൾ ആവശ്യമായി വന്നാൽ ബന്ധപ്പെട്ട വകുപ്പ് സെക്രട്ടറിയെ കാബിനറ്റ് യോഗത്തിലേക്ക് വിളിക്കുന്ന സംഭവങ്ങൾ സാധാരണമാണ്.
കോവിഡ് -19 ലോക്ക്ഡൗൺ സമയത്ത്, സംസ്ഥാന മന്ത്രിസഭ ഓൺലൈൻ മോഡിൽ നടന്നിരുന്നു. ലോക്ക്ഡൗൺ നിയന്ത്രണങ്ങൾ പിൻവലിച്ചതിന് ശേഷവും സാധാരണ നില പുനഃസ്ഥാപിക്കുന്നത് വരെ ഈ രീതി തുടർന്നു വന്നു.
