ഇടുക്കി: സബ്കളക്ടര് രേണു രാജിനോട് അപമര്യാദയായി സംസാരിച്ച സംഭവത്തില് എസ്.രാജേന്ദ്രന് എം.എല്.എ യോട് വിശദീകരണം തേടുമെന്ന് സി.പി.എം. തെറ്റായ പെരുമാറ്റം പാര്ട്ടിക്ക് അംഗീകരിക്കാനാകില്ലെന്നും സി.പി.എം ഇടുക്കി ജില്ലാ സെക്രട്ടറി കെ.കെ ജയചന്ദ്രന് പറഞ്ഞു.
റവന്യൂ വകുപ്പിന്റെ അനുമതിയില്ലാതെ പഞ്ചായത്ത് പണിയുന്ന കെട്ടിടത്തിന് സ്റ്റോപ്പ് മെമ്മോ നല്കിയ സംഭവത്തിലാണ് സബ് കലക്ടറെ എസ്. രാജേന്ദ്രന് എം.എല്.എ അധിക്ഷേപിച്ചത്.
“ചുമ്മാ ബുദ്ധിയും ബോധവുമില്ലാത്തതിനെയെല്ലാം ഇങ്ങോട്ട് വിട്ടോളും, ഒരു ഐ.എ.എസ് കിട്ടിയെന്ന് പറഞ്ഞ്, അവള് ഇതെല്ലാം വായിച്ച് പഠിക്കണ്ടേ ” ഈ തരത്തിൽ വളരെ മോശമായ രീതിയിലാണ് കെട്ടിടം പണി തടയാനെത്തിയ റവന്യൂ ഉദ്യോഗസ്ഥരോട് എം.എൽ.എ പറഞ്ഞത്.
പഴയ മൂന്നാറില് മുതിരപ്പുഴയാറിന് സമീപത്ത് കെ.ഡി.എച്ച് കമ്പനി പഞ്ചായത്തിന് വിട്ടു നല്കിയ സ്ഥലത്താണ് ഒരു കോടിയോളം രൂപ മുതല് മുടക്കി പഞ്ചായത്ത് വനിതാ വ്യാവസായ കേന്ദ്രം പണി കഴിപ്പിക്കുന്നത്. നിര്മ്മാണ പ്രവര്ത്തനം ആരംഭിച്ച കാലം മുതല് മുതിരപുഴയാറിന്റ തീരം കയ്യേറിയാണ് നിര്മ്മാണം നടത്തുന്നതെന്ന് ആരോപിച്ച് പരിസ്ഥിതി പ്രവര്ത്തകരടക്കം രംഗത്തെത്തിയിരുന്നു. ഈ സാഹചര്യത്തിലാണ് നിലവില് റവന്യൂ വകുപ്പ് അന്വേഷണം നടത്തി, എന്.ഒ.സി വാങ്ങാതെയാണ് കെട്ടിടം നിര്മ്മിക്കുന്നതെന്ന് കണ്ടെത്തിയത്. ഈ കേട്ടതിനാണ് റവന്യൂ വകുപ്പ് സ്റ്റോപ് മെമ്മോ നല്കിയത്. സംഭവത്തിലാണ് സബ് കളക്ടറെ പൊതുജനമധ്യത്തില് വെച്ചാണ് എം.എല്.എ അപമാനിച്ചത്.
