സംസ്ഥാന ജൂനിയര് അത്ലറ്റിക് ചാമ്പ്യന്ഷിപ്പ് നിര്ത്തിവച്ചു. വോളണ്ടിയറായിരുന്ന വിദ്യാര്ത്ഥിയുടെ തലയില് ഹാമര് വീണ് പരിക്കേറ്റതിനെ തുടര്ന്നാണ് ചാമ്പ്യന്ഷിപ്പ് നിര്ത്തിവച്ചത്. പരിക്കേറ്റ വിദ്യാര്ത്ഥിയുടെ നില ഗുരുതരമായി തുടരുകയാണ്. പാലാ മുനിസിപ്പല് സ്റ്റേഡിയത്തില് വെള്ളിയാഴ്ച ഉച്ചയോടെ ഹാമര് ത്രോ മത്സരം നടക്കുന്നതിനിടെയാണ് അപകടം ഉണ്ടായത്.
ഒരുവിഭാഗം കായികാധ്യാപകര് സംസ്ഥാന വ്യാപകമായി നിസഹകരണം നടത്തുന്നതിനിടെയാണ് പാലായില് ജൂണിയര് അത്ലറ്റിക് മീറ്റ് നടക്കുന്നത്. അധ്യാപകരുടെ കുറവിനെത്തുടര്ന്ന് വിദ്യാര്ത്ഥികളെ ഡ്യൂട്ടിക്ക് നിയോഗിക്കുകയായിരുന്നു. പാലാ സെന്റ് തോമസ് ഹയര് സെക്കന്ഡറി സ്കൂളിലെ പ്ലസ് വണ് വിദ്യാര്ത്ഥി അഫീല് ജോണ്സനാ(16)ണു പരിക്കേറ്റത്. അഫീലിനെ പാലാ ജനറല് ആശുപത്രിയിലും പിന്നീട് കോട്ടയം മെഡിക്കല് കോളജ് ആശുപത്രിയിലെ തീവ്രപരിചരണ വിഭാഗത്തിലും പ്രവേശിപ്പിച്ചു.
മേലുകാവ് ചെവ്വൂര് കുറിഞ്ഞംകുളം ജോര്ജ് ജോണ്സന്റെ മകനാണ് അഫീല്. ജാവലിന് മത്സര വോളണ്ടിയറായിരുന്ന അഫീല് ജാവലിന് എടുക്കാനായി ഗ്രൗണ്ടിലേക്ക് നീങ്ങവേ മൂന്നു കിലോ തൂക്കമുള്ള ഹാമര് തലയില് വന്നു പതിക്കുകയായിരുന്നു. അടുത്തടുത്താണ് ഇരു മത്സരവും നടന്നിരുന്നത്. വിദ്യാര്ത്ഥിക്ക് പരിക്കേറ്റ സംഭവത്തില് സംഘാടകര്ക്കെതിരേ പാലാ പോലീസ് കേസെടുത്തു. കുറ്റകരമായ അനാസ്ഥയും അശ്രദ്ധയുംമൂലം അപകടമുണ്ടായതിന് 338-ാം വകുപ്പ് പ്രകാരമാണ് കേസ്.
