കാസർകോട്: തിങ്കൾ മുതൽ ചൊവ്വാഴ്ച വരെ കാസര്കോട്, കൊല്ലം, ആലപ്പുഴ, കൊച്ചി, പൊന്നാനി, കോഴിക്കോട്, കണ്ണൂര് ജില്ലകളില് രണ്ട് മുതല് 2.7 വരെ ഉയരത്തില് തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം അറിയിച്ചു.
സെപ്റ്റംബര് ഏഴ് മുതല് ഒമ്പത് വരെ കാസർകോട് തീരപ്രദേശത്തിന്റെ താഴ്ന്ന പ്രദേശങ്ങളില് വേലിയേറ്റ സമയത്ത് വെള്ളം കയറാന് സാധ്യതയുണ്ട്. കടലാക്രമണം രൂക്ഷമാകാന് സാധ്യത ഉള്ളതിനാല് തീരമേഖലയില് വള്ളങ്ങളും ബോട്ടുകളും ഇറക്കുന്നത് ഒഴിവാക്കണം.മല്സ്യബന്ധന യാനങ്ങള് ഹാര്ബറില് സുരക്ഷിതമായി കെട്ടിയിട്ട് സൂക്ഷിക്കണം. വള്ളങ്ങള് തമ്മില് സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം.
മല്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. ബീച്ചിലേക്കുള്ള വിനോദ സഞ്ചാര യാത്രകളും കടലില് ഇറങ്ങിയുള്ള വിനോദങ്ങളും പൂര്ണ്ണമായും ഒഴിവാക്കണം.ഉയര്ന്ന തിരമാലകളുള്ളപ്പോള് വള്ളങ്ങളും ബോട്ടുകളും കരക്കടുപ്പിക്കുന്നതും കടലിലേക്ക് ഇറക്കുന്നതും ഒഴിവാക്കണം. ആഴക്കടലില് മല്സ്യബന്ധനം തുടരുന്നതില് തടസ്സമില്ല.
