കോവിഡ് 19 വൈറസ് ബാധയെ തുടര്ന്ന് ഏര്പ്പെടുത്തിയ 21 ദിവസത്തെ ലോക്ഡൗണ് നീട്ടിയേക്കും. ലോക്ഡൗണ് നീട്ടണമെന്ന് വിവിധ സംസ്ഥാനങ്ങള് കേന്ദ്രസര്ക്കാറിനോട് ആവശ്യപ്പെട്ടിട്ടുണ്ട്. സംസ്ഥാനങ്ങളുമായുള്ള ചര്ച്ചകള്ക്ക് ശേഷം ഇക്കാര്യത്തില് അന്തിമ തീരുമാനമെടുക്കുമെന്നാണ് സൂചന. ഇതിനൊപ്പം ഐ.സി.എം.ആര് അടക്കമുള്ള ഏജന്സികളുടെ അഭിപ്രായം കൂടി പരിഗണിച്ചാവും തീരുമാനം.
ലോകത്തെ സ്ഥിതിഗതികള് നിരീക്ഷിച്ചു വരുകയാണ്. ദേശീയ താല്പര്യം മുന്നിര്ത്തി ലോക്ഡൗണ് നീട്ടുന്നതില് തീരുമാനമെടുക്കുമെന്ന് കേന്ദ്രമന്ത്രി പ്രകാശ് ജാവ്ദേക്കര് പറഞ്ഞിരുന്നു. ലോക്ഡൗണ് പിന്വലിക്കുന്നതിനെ കുറിച്ച് പഠിക്കാന് വിവിധ കമ്മിറ്റികളെ നിയോഗിച്ചിട്ടുണ്ടെന്നും പ്രകാശ് ജാവ്ദേക്കര് വ്യക്തമാക്കിയിരുന്നു.
തെലങ്കാന, മഹാരാഷ്ട്ര, രാജസ്ഥാന് തുടങ്ങിയ സംസ്ഥാനങ്ങള് ലോക്ഡൗണ് നീട്ടണമെന്ന ആവശ്യം ഉന്നയിച്ചിട്ടുണ്ട്. ഏപ്രില് 14നാണ് കോവിഡ് വൈറസ് ബാധയെ തുടര്ന്ന് രാജ്യത്ത് ഏര്പ്പെടുത്തിയ 21 ദിവസത്തെ ലോക്ഡൗണ് തീരുന്നത്.
