കാഞ്ഞങ്ങാട്: ഹോമിയോപ്പതി ചികിത്സാരംഗത്ത് 38വർഷം പിന്നിട്ട കാഞ്ഞങ്ങാട്ടെ ശ്യാമള ഡോക്ടറെ ഇൻസ്റ്റിറ്റ്യൂഷൻ ഓഫ് ഹോമിയോപ്പത് സ് കേരള (IHK) കാസർഗോഡ് ജില്ലാ ഘടകം ആദരിച്ചു. ഹോമിയോപ്പതി രംഗത്ത് 38 വർഷത്തെ സ്തുത്യർഹമായ സേവനം പൂർത്തിയാക്കിയ ഡോക്ടറാണ് ശ്യാമള ബാലകൃഷ്ണൻ. രോഗീപരിചരണ രംഗത്തും ഹോമിയോപ്പതി സമൂഹത്തിനും നൽകിയ മഹത്തായ സംഭാവനകൾ പരിഗണിച്ച്, IHK-യുടെ പ്രധാന ഭാരവാഹികൾ പങ്കെടുത്ത ചടങ്ങിലാണ് ഡോക്ടറെ ആദരിച്ചത്. ബഹുമാനസൂചകമായി പൊന്നാട അണിയിക്കുകയും സംഘടനയുടെ സ്നേഹാദരങ്ങളുടെ പ്രതീകമായി ഉപഹാരം നൽകുകയും ചെയ്തു. നാല് പതിറ്റാണ്ടോളം നീണ്ട ഔദ്യോഗിക ജീവിതത്തിൽ ഡോ. ശ്യാമള ബാലകൃഷ്ണൻ പ്രകടിപ്പിച്ച അചഞ്ചലമായ അർപ്പണബോധം, ചികിത്സാ വൈദഗ്ദ്ധ്യം, എണ്ണമറ്റ രോഗികളിലും സഹപ്രവർത്തകരിലും ചെലുത്തിയ നല്ല സ്വാധീനം എന്നിവയെക്കുറിച്ച് ചടങ്ങിൽ സംസാരിച്ചവർ എടുത്തുപറഞ്ഞു. അവരുടെ ഔദ്യോഗിക ജീവിതം ഹോമിയോപ്പതിയുടെ അടിസ്ഥാന തത്വങ്ങൾക്കും ആതുരസേവനത്തിനും ഒരു മികച്ച മാതൃകയാണെന്ന് ഭാരവാഹികൾ അഭിപ്രായപ്പെട്ടു. IHK കാസർഗോഡ് ജില്ലാ സെക്രട്ടറി ഡോ. ജയശങ്കർ എം.പി, ജില്ലാ ട്രഷറർ ഡോ. വിവേക് സുധാകരൻ, കാഞ്ഞങ്ങാട് യൂണിറ്റ് പ്രസിഡന്റ് ഡോ. നിതാന്ത് ബാൽശ്യാം എന്നിവർക്കൊപ്പം കാഞ്ഞങ്ങാട് യൂണിറ്റ് സിന്ദൂരം കോർഡിനേറ്റർ ഡോ. അഞ്ജു എം.ജി, കാസർഗോഡ് യൂണിറ്റ് സിന്ദൂരം കോർഡിനേറ്റർ ഡോ. സ്വാതി കോടോത്ത് എന്നിവരും പങ്കെടുത്തു. ഡോക്ടർ ശ്യാമള ബാലകൃഷ്ണൻ ആദരവിന് നന്ദി അർപ്പിച്ചുകൊണ്ട് മറുപടി പ്രസംഗം നടത്തി.
