മുതിര്ന്ന കോണ്ഗ്രസ് നേതാവും മുന് കേരള മുഖ്യമന്ത്രിയും മുന് പ്രതിരോധ വകുപ്പ് മന്ത്രിയുമായ എ.കെ ആന്റണിയുടെ മകൻ അനില് ആന്റണി ബി.ജെ.പി അംഗത്വം സ്വീകരിച്ചു. കേന്ദ്രമന്ത്രി പീയൂഷ് ഗോയലിൽ നിന്ന് അദ്ദേഹം ബി.ജെ.പി അംഗത്വം ഏറ്റുവാങ്ങി.
ഇന്ന് മൂന്ന് മണിക്ക് പ്രധാന വ്യക്തി പാർട്ടിയിൽ ചേരുമെന്ന് ബി.ജെ.പി വാർത്താക്കുറിപ്പ് ഇറക്കിയിരുന്നു. തുടർന്ന് അനിൽ ആന്റണി ബി.ജെ.പിയിൽ ചേരുമെന്ന അഭ്യൂഹം ശക്തമായിരുന്നു. ഇതിന് പിന്നാലെയാണ് അനിൽ ആന്റണി ബി.ജെ.പി ആസ്ഥാനത്തെത്തിയത്. സംസ്ഥാന അധ്യക്ഷൻ കെ. സുരേന്ദ്രനൊപ്പമാണ് അനിൽ ബിജെപി ആസ്ഥാനത്തെത്തിയത്.
കെ.പി.സി.സി ഡിജിറ്റൽ മീഡിയ കൺവീനറും എ.ഐ.സി.സി സോഷ്യൽ മീഡിയ കോഓർഡിനേറ്ററുമായിരുന്നു അനിൽ ആന്റണി. ബി.ബി.സി വിവാദത്തെ തുടര്ന്ന് കോണ്ഗ്രസുമായി തെറ്റി അദ്ദേഹം പദവികള് രാജിവെക്കുകയായിരുന്നു.
