മാനന്തവാടി: വയനാട് ജില്ലയിലെ വെത്തിരിയില് പൊലീസും മാവോയിസ്റ്റുകളും തമ്മില് വെടിവയ്പ്പ് ഉണ്ടായ സാഹചര്യത്തില് ജില്ലാ പൊലീസ് മേധാവി ആര് കറുപ്പുസ്വാമിയുടെ നേതൃത്വത്തില് യോഗം ചേരുന്നു. ഇന്നലെ നടന്ന വെടിവയ്പ്പിനെ തുടര്ന്ന് ഒരു മാവോയിസ്റ്റ് കൊല്ലപ്പെട്ടിരുന്നു. സംഭവത്തെ തുടര്ന്ന് വൈത്തിരിയിലും പ്രദേശങ്ങളിലും കനത്ത പോലീസ് സുരക്ഷയാണ് ഏര്പ്പെടുത്തിയിരിക്കുന്നത് .
പോലീസുമായുള്ള ഏറ്റുമുട്ടലില് ഒരു മാവോയിസ്റ്റിന് ഗുരുതരമായി പരിക്കേറ്റുവെന്നായിരുന്നു ആദ്യം പുറത്ത് വന്ന റിപ്പോര്ട്ടുകള്. എന്നാല് പിന്നീട് കാടിനുള്ളില് നടത്തിയ പരിശോധനയിലാണ് ഒരാള് കൊല്ലപ്പെട്ടതായി പൊലീസ് സ്ഥിരീകരിച്ചത്. ആയുധ സജ്ജരായ അഞ്ചംഗ സംഘമാണ് വെടിവെയ്പ്പ് നടത്തിയതെന്ന് പൊലീസ് പറഞ്ഞു. ഏറ്റുമുട്ടല് ഉണ്ടായ പശ്ചാത്തലത്തില് കണ്ണൂര് റേഞ്ച് ഐ.ജി വയനാട്ടിലെത്തി.
പോലീസിന്റെ കനത്ത സുരക്ഷാ വലയത്തിലാണ് വൈത്തിരി ഇപ്പോള്. ഇവിടേക്ക് മറ്റ് ജില്ലകളില് നിന്നുള്ള തണ്ടര്ബോള്ട്ട് സംഘം രാവിലെ ഒമ്പത് മണിയോടെ എത്തുമെന്ന് പൊലീസ് അറിയിച്ചു. മാവോയിസ്റ്റുകളുമായുള്ള വെടിവയ്പ്പിനെ തുടര്ന്ന് തടഞ്ഞ കോഴിക്കോട് വയനാട് ദേശീയപാതയിലെ ഗതാഗതം പുനസ്ഥാപിച്ചിട്ടുണ്ട്. പ്രദേശത്ത് കനത്ത ജാഗ്രതാ നിര്ദേശം നല്കിയിട്ടുണ്ട്. മാവോയിസ്റ്റുകള് എത്തിയ റോഡിലെ റിസോര്ട്ട് അധികൃതരോടും താമസക്കാരോടും പുറത്തിറങ്ങരുതെന്നാണ് പൊലീസ് നിര്ദേശം നല്കിയിരിക്കുന്നത്.
