കേരള കോണ്ഗ്രസിന്റെ (എം)പുതിയ ചെയര്മാനെ കണ്ടെത്താനുള്ള തിരഞ്ഞെടുപ്പിനെതിരെ പാര്ട്ടിയിലെ ഒരു വിഭാഗം കോടതിയെ സമീപിച്ചത് ദുരൂഹമെന്ന് പി.ജെ ജോസഫ്. പാര്ട്ടി ചെയര്മാന് പദവിയും പാര്ലമെന്ററി പാര്ട്ടി നേതൃസ്ഥാനവും ഒരുമിച്ച് വഹിക്കില്ലെന്നും അദ്ദേഹം പറഞ്ഞു. താന് ഏതു പദവി വഹിക്കണമെന്ന് പാര്ട്ടി തീരുമാനം എടുക്കുമെന്നും താത്കാലിക ചെയര്മാന് കൂടിയായപി. ജെ ജോസഫ് വ്യക്തമാക്കി.
തിരഞ്ഞെടുപ്പിനെ ചിലര് ഭയക്കുന്നുവെന്നാണ് പാര്ട്ടിയിലെ ഒരു വിഭാഗം കോടതിയെ സമീപിച്ചതില് നിന്നും മനസ്സിലാക്കുന്നത്. പാര്ട്ടിയിലെ എല്ലാ പ്രശ്നങ്ങളും രണ്ട് ദിവസങ്ങള്ക്കകം പരിഹകരിക്കുമെന്നും പി.ജെ ജോസഫ് കൂട്ടിച്ചേര്ത്തു. കേരളാ കോണ്ഗ്രസിന്റെ ചെയര്മാന് തിരഞ്ഞെടുപ്പിനെതിരെ കൊല്ലം ജില്ലാ ജനറല് സെക്രട്ടറി മനോജാണ് കോടതിയെ സമീപിച്ചത്.
അന്തരിച്ച മുന് ചെയര്മാന് കെ. എം മാണിയുടെ അനുസ്മരണത്തിന്റെ മറവില് പുതിയ ചെയര്മാനെ തെരഞ്ഞെടുക്കാന് നീക്കം നടക്കുന്നുണ്ടെന്നും ഇത് തടയണമെന്നുമാവശ്യപ്പെട്ടായിരുന്നു മനോജ് ഹര്ജി നല്കിയത്. പാര്ട്ടിയുടെ ബൈലോ പ്രകാരമല്ല ചെയര്മാന് തെരഞ്ഞെടുപ്പ് നടക്കുന്നതെന്നും മനോജ് ഹര്ജിയില് ആരോപിച്ചിരുന്നു. ഹര്ജിയെ തുടര്ന്ന് തിരുവനന്തപുരത്തെ മാണി അനുസ്മരണത്തിനിടെ പുതിയ ചെയര്മാനെ തെരെഞ്ഞെടുക്കരുതെന്ന് കോടതി നിര്ദ്ദേശം നല്കുകയും ചെയ്തിരുന്നു.
