കോഴിക്കോട്: 371 ജൂനിയര് പബ്ലിക് ഹെല്ത്ത് നഴ്സുമാരെ സ്ഥലം മാറ്റിക്കൊണ്ട് കൂട്ട സ്ഥലംമാറ്റവുമായി ആരോഗ്യവകുപ്പ്. അടുത്തമാസം ദേശീയതലത്തില് നടക്കാനിരിക്കുന്ന മീസില്സ്- റുബെല്ല വാക്സിനേഷന് പ്രവര്ത്തനങ്ങള്ക്ക് നേതൃത്വം നല്കുന്നതും ഏകോപിപ്പിക്കുന്നതും ഇവരാണ്. ഒന്നുമുതല് 15 വയസ്സുവരെയുള്ള കുട്ടികളെ കുത്തിവെപ്പിനു വിധേയരാക്കുന്ന വാക്സിനേഷന് കാക്യാമ്പയിന്റെ മുന്നോടിയായി ബോധവത്കരണ പ്രവര്ത്തനങ്ങള് ശക്തമാക്കേണ്ടതുണ്ട്. ഇതിനിടയില് സ്ഥലം മാറ്റം വരുന്നത് ഇത്തരം പ്രവര്ത്തനങ്ങളെ ബാധിക്കുമെന്നും ആശങ്കയുണ്ട്.
സ്ഥലം മാറ്റിക്കൊണ്ടുള്ള ഉത്തരവ് ആഗസ്റ്റ് 31ന് ആണ് പുറത്തിറങ്ങിയത്. കഴിഞ്ഞ 24ന് 531 ജൂനിയര് ഹെല്ത്ത് നഴ്സുമാരെ സ്ഥലം മാറ്റിക്കൊണ്ടുള്ള ഉത്തരവിറങ്ങിയിരുന്നു. ഇതു കഴിഞ്ഞ് ഒരാഴ്ച കഴിഞ്ഞപ്പോഴാണ് അടുത്ത ഉത്തരവ്.ഏപ്രില്, മേയ് കാലഘട്ടത്തില് നടത്തേണ്ട സ്ഥലം മാറ്റം പകര്ച്ചപ്പനി പ്രതിരോധ നടപടികള് ശക്തമാക്കുന്നതിനിടയില് നടത്തുന്നത് ജീവനക്കാര്ക്ക് പ്രയാസം സൃഷ്ടിക്കുന്നുവെന്ന് ആക്ഷേപമുണ്ടായിരുന്നു.
ഓണപ്പരീക്ഷയും മറ്റും നടക്കുന്നതിനിടക്ക് പെട്ടെന്നുള്ള സ്ഥലംമാറ്റ ഉത്തരവ് ജീവനക്കാര്ക്ക് വ്യക്തിപരമായും ബുദ്ധിമുട്ടുണ്ടാക്കിയിരുന്നു. ഇതുകൂടാതെ ഫീല്ഡ് പ്രവര്ത്തനങ്ങള്ക്ക് നേതൃത്വം നല്കുന്ന ജൂനിയര് പബ്ലിക് ഹെല്ത്ത് നഴ്സുമാരെ സ്ഥലം മാറ്റുന്നതും ആരോഗ്യവകുപ്പിെന്റ പ്രവര്ത്തനങ്ങളെ ഏറെ ബാധിക്കുമെന്നും ഇവര് പറയുന്നു.
