തിരുവനന്തപുരം: പോപ്പുലർ ഫ്രണ്ടിൻ്റെ മഞ്ചേരിയിലെ ഗ്രീൻവാലി അക്കാദമി ദേശീയ അന്വേഷണ ഏജൻസി (എൻ.ഐ.എ) കണ്ടെത്തി. പി.എഫ്.ഐയുടെ പ്രധാന ആയുധ പരിശീലന കേന്ദ്രമാണ് ഗ്രീൻവാലിയെന്ന് എൻ.ഐ.എ വ്യക്തമാക്കി. 10 ഹെക്ടർ സ്ഥലത്ത് വ്യാപിച്ചുകിടക്കുന്ന ഗ്രീൻ വാലി അക്കാദമിയിൽ എൻ.ഡി.എഫും പി.എഫ്.ഐയും ആയുധ പരിശീലനം നടത്തിയിരുന്നതായാണ് എൻ.ഐ.എയുടെ കണ്ടെത്തൽ.
മഞ്ചേരിയിലെ 24 ഏക്കര് സ്ഥലത്ത് വ്യാപിച്ചുകിടക്കുന്ന പരിശീലന കേന്ദ്രമാണ് ഗ്രീന്വാലി അക്കാദമി. ഈ കെട്ടിടം ആദ്യം പി.എഫ്.ഐയില് ലയിച്ച നാഷണല് ഡെവലപ്മെണ്ട് ഫ്രണ്ടിൻ്റെ (എൻ.ഡി.എഫ്) കേഡറുകള് ഉപയോഗിച്ചിരുന്നതെന്നാണ് എന്.ഐ.എയുടെ കണ്ടെത്തല്. ഇതിനെ തുടര്ന്നാണ് കൊച്ചി യൂണിറ്റില് നിന്നുള്ള ചീഫ് ഇന്സ്പെക്ടര് ഉമേഷ് റായിയുടെ നേതൃത്വത്തില് കണ്ടുകെട്ടല് നടപടികള് ആരംഭിച്ചത്.
ആയുധപരിശീലനം, കായിക പരിശീലനം, സ്ഫോടക വസ്തുക്കളുടെ ഉപയോഗവും എന്നിവയെ കുറിച്ചുള്ള പരിശീലന സെഷനുകള്ക്കായി പി.എഫ്.ഐ ഈ കെട്ടിടം ഉപയോഗിച്ചതായി അന്വേഷണത്തില് വ്യക്തമായിയിട്ടുണ്ട്. പോപ്പുലര് ഫ്രണ്ട് നിരോധനത്തിന് ശേഷം കേരളത്തില് ആറാമത്തെ പി.എഫ്.ഐ ആയുധ പരിശീലന കേന്ദ്രവും സംഘടനയുടെ പതിനെട്ടാമത്തെ വസ്തുവുമാണ് എന്.ഐ.എ കണ്ടുകെട്ടിയത്.
മലബാര് ഹൗസ്, പെരിയാര്വാലി, വള്ളുവനാട് ഹൗസ്, കാരുണ്യ ചാരിറ്റബിള് ട്രസ്റ്റ്, ട്രിവാന്ഡ്രം എജ്യുക്കേഷന് ആന്ഡ് സര്വീസ് ട്രസ്റ്റ് എന്നിവ എന്.ഐ.എ നേരത്തെ കണ്ടുകെട്ടിയിരുന്നു.പോപ്പുലര് ഫ്രണ്ട് നിരോധനത്തെ തുടര്ന്ന് സ്ഥാപനത്തില് എന്.ഐ.എ സംഘം പരിശോധന നടത്തിയിരുന്നു.
അക്കാദമിയിലെ ടെക്നിക്കല് ഇന്സ്റ്റിറ്റ്യൂട്ടില് പ്രവര്ത്തിക്കുന്ന ലൈബ്രറിയില് നിന്ന് ഏതാനും പുസ്തകങ്ങളും മൊബൈല് ഫോണുകളും കസ്റ്റഡിയിലെടുക്കുകയും ചെയ്തു. അറസ്റ്റിലായ പോപ്പുലര് ഫ്രണ്ട് നേതാക്കളും സ്ഥാപനവും തമ്മിലുള്ള ബന്ധത്തെ കുറിച്ചുള്ള വിവരങ്ങളും ശേഖരിച്ചു. ഇതിൻ്റെ തുടര്ച്ചയായാണ് ഇപ്പോഴത്തെ നടപടി. ഗ്രീന്വാലി അക്കാദമിക്ക് കീഴില് വിവിധ വിദ്യാഭ്യാസ സ്ഥാപനങ്ങള് പ്രവര്ത്തിച്ചു വരുന്നുണ്ട്.
