തിരുവനന്തപുരം: എസ്.എസ്.എല്.സി ഫലം സെക്രട്ടേറിയേറ്റിലെ പി.ആര് ചേംബറില് നടന്ന വാര്ത്താ സമ്മേളനത്തില് വിദ്യഭ്യാസമന്ത്രി വി.ശിവന്കുട്ടി പ്രഖ്യാപിച്ചു. എസ്എസ്എല്സി റെഗുലര് വിഭാഗത്തില് 4,26,469 വിദ്യാര്ഥികള് പരീക്ഷയെഴുതി. ഇതില് 4,23,303 വിദ്യാര്ഥികളാണ് ഉപരിപഠനത്തിന് യോഗ്യത നേടിയത്. 99.26ആണ് ഇത്തവണത്തെ എസ്എസ്എല്സി വിജയ ശതമാനം. 99.47 ശതമാനമായിരുന്നു കഴിഞ്ഞ തവണ. 44,363 വിദ്യാര്ഥികള് ഫുള് എ പ്ലസ് നേടി.
കഴിഞ്ഞ വര്ഷം 1,25,509 വിദ്യാര്ഥികള്ക്കാണ് എല്ലാവിഷയത്തിനും എ പ്ലസ് ലഭിച്ചത്. കോവിഡ് കാരണം കലാ-കായിക മത്സരങ്ങള് നടക്കാത്ത സാഹചര്യത്തില് എസ്.എസ്.എല്.സി, പ്ലസ് ടു പ്ലസ് ടു പരീക്ഷകളില് ഇത്തവണയും ഗ്രേസ് മാര്ക്ക് നല്കിയിട്ടില്ല.
കണ്ണൂരാണ് ഏറ്റവും കൂടുതല് വിജയ ശതമാനമുള്ള റവന്യു ജില്ല. 99.76% ആണ് ജില്ലയിലെ വിജയശതമാനം. ഏറ്റവും കുറവ് വിജയ ശതമാനമുള്ള റവന്യു ജില്ല വയനാടാണ്- 98.07%. വിജയശതമാനം ഏറ്റവും കൂടുതലുള്ള വിദ്യാഭ്യാസ ജില്ല പാല (99.94%). വിജയശതമാനം ഏറ്റവും കുറവുള്ള വിദ്യാഭ്യാസ ജില്ല ആറ്റിങ്ങല് (97.98%). ഏറ്റവും കൂടുതല് ഫുള് എ പ്ലസ് ലഭിച്ച വിദ്യാഭ്യാസ ജില്ല- മലപ്പുറം (3024). 2,961 സെൻ്റെറുകളിലായി പരീക്ഷ എഴുതിയ 4,26,469 വിദ്യാർത്ഥികളുടെ റിസൾട്ടാണ് പ്രഖ്യാപിച്ചത്.
