ശശി തരൂരിനെ പാർലമെന്ററി അധ്യക്ഷനാക്കാൻ ശുപാർശ ചെയ്ത് കോൺഗ്രസ്. പാർലമെന്ററി ശാസ്ത്ര സാങ്കേതിക സമിതിയുടെ അധ്യക്ഷ സ്ഥാനത്തേക്ക് ശശി തരൂരിൻ്റെ പേര് പാർട്ടി നിർദേശിച്ചു. കോൺഗ്രസിന് അദ്ധ്യക്ഷ സ്ഥാനം ലഭിച്ച ഏക സമിതിയാണ് ശാസ്ത്ര സാങ്കേതിക സമിതി.
കോൺഗ്രസ് അദ്ധ്യക്ഷ തെരഞ്ഞെടുപ്പ് ഈ വരുന്ന 17ന് നടക്കാനിരിക്കെയാണ് എ.ഐ.സി.സിയുടെ തീരുമാനം. നേരത്തെ ഇൻഫർമേഷൻ ടെക്നോളജി സ്റ്റാൻഡിംഗ് കമ്മിറ്റിയിൽ നിന്നും ശശി തരൂരിനെ മാറ്റിയിരുന്നു.അതേസമയം, തെരഞ്ഞെടുപ്പിന് ദിവസങ്ങൾ മാത്രം ശേഷിക്കെ പ്രചാരണം ശക്തമാക്കുകയാണ് ശശി തരൂരും മല്ലികാർജുൻ ഖാർഗെയും.
ബിഹാർ, ഉത്തർപ്രദേശ് എന്നിവിടങ്ങളിൽ ഖാർഗെ പ്രചാരണം നടത്തും. ഉത്തർപ്രദേശിൽ തന്നെയാണ് തരൂരിൻ്റെയും പ്രചാരണ പരിപാടികൾ നടക്കുന്നത്. ശശി തരൂരിന് മുതിർന്ന നേതാക്കളുടെ പിന്തുണ ഇല്ലെങ്കിലും സോഷ്യൽ മീഡിയയിൽ ഉൾപ്പടെ പിന്തുണ വർധിക്കുകയാണെന്നാണ് റിപ്പോർട്ട്.
