തിരുവനന്തപുരം വിമാനത്താവളത്തിന്റെ നടത്തിപ്പ് ചുമതലയുമായി ബന്ധപ്പെട്ട് നിയമസഹായം തേടിയ കമ്പനിയും അദാനിയും തമ്മിൽ ബന്ധമുണ്ടെന്ന് അറിയില്ലായിരുന്നുവെന്ന് മന്ത്രി ഇ.പി. ജയരാജൻ. വിഷയത്തിൽ സംസ്ഥാന സർക്കാർ പ്രതിക്കൂട്ടിലല്ലെന്നും അദ്ദേഹം പറഞ്ഞു. കണ്സള്ട്ടന്സി സേവനം തേടിയ സിറിള് അമര്ചന്ദ് മംഗള്ദാസ് ഗ്രൂപ്പ് തങ്ങളുടെ അദാനി ബന്ധം സംസ്ഥാന സര്ക്കാരില്നിന്ന് മറച്ചുവച്ചു.
അദാനിയുടെ മകന്റെ ഭാര്യയുടെ പിതാവാണ് ഈ കണ്സള്ട്ടന്സിയുടെ പ്രധാനിയെന്ന കാര്യം സര്ക്കാരിന് അറിയില്ലായിരുന്നു. ഒരു ജെന്റില്മാന് ലീഗല് കണ്സള്ട്ടന്സി എന്ന നിലയിലാണ് സംസ്ഥാന സര്ക്കാര് കണ്സള്ട്ടന്സി ഏല്പിച്ചത്.
എന്നാല് അദാനിയാണ് മറുപക്ഷത്ത് എന്നറിഞ്ഞപ്പോള് കേസിന്റെ കാര്യങ്ങള് കണ്സള്ട്ടന്സി സര്ക്കാരിന്റയോ കെഎസ്ഐഡിസിയുടെയോ ശ്രദ്ധയില്പ്പെടുത്തേണ്ടിയിരുന്നു. ഈ കാര്യങ്ങള് പൂര്ണമായും സിറിള് അമര്ചന്ദ് മംഗള്ദാസ് ഗ്രൂപ്പ് മറച്ചുവച്ചുവെന്നും മന്ത്രി കൂട്ടിച്ചേർത്തു.
