സംസ്ഥാന നിയമസഭയിൽ കെ.കെ രമയ്ക്കെതിരായ പരാമര്ശത്തിനെതിരെ എം.എം മണിയെ രൂക്ഷമായി വിമര്ശിച്ച് രാജ്മോഹന് ഉണ്ണിത്താന് എം.പി. മുഖ്യമന്ത്രി പിണറായി വിജയനാണ് മണിയെക്കൊണ്ട് രമക്കെതിരെ പറയിച്ചത്. കഴുത കാമം കരഞ്ഞു തീര്ക്കുന്നതു പോലെയാണ് മണിയുടെ പ്രസ്താവനകളെന്നും രാജ്മോഹന് ഉണ്ണിത്താന് പറഞ്ഞു. ഏത് കോത്താഴത്തെ ഗ്രാമ്യഭാഷയാണ് മണി പറയുന്നതെന്ന് ഉണ്ണിത്താന് ചോദിച്ചു.
മുഖ്യമന്ത്രിയുടെ നിര്ദ്ദേശപ്രകാരം ചുടു ചോറുവാരുന്ന കുട്ടിക്കുരങ്ങനാണ് മണിയെന്ന് രാജ്മോഹന് ഉണ്ണിത്താന് വിമര്ശിച്ചു. ആഭ്യന്തര വകുപ്പിൻ്റെ ധനാഭ്യര്ത്ഥന ചര്ച്ചയില് പങ്കെടുത്ത് പ്രസംഗിക്കവെയാണ് മണി രമയ്ക്കെതിരെ അധിക്ഷേപ പരാമര്ശം നടത്തിയത്.
‘ഒരു മഹതി ഇപ്പോള് പ്രസംഗിച്ചു മുഖ്യമന്ത്രിക്ക് എതിരെ, എല്ഡിഎഫ് സര്ക്കാരിന് എതിരെ, ഞാന് പറയാം ആ മഹതി വിധവയായി പോയി, അവരുടേതായ വിധി, അതിനു ഞങ്ങളാരും ഉത്തരവാദികളല്ല’- എന്നായിരുന്നു മണിയുടെ പരാമര്ശം.
