തിരുവനന്തപുരം: പേവിഷബാധ പ്രതിരോധ വാക്സിന് ഗുണനിലവാരം വീണ്ടും പരിശോധിക്കണമെന്ന് ആവശ്യപ്പെട്ട് കേന്ദ്ര ആരോഗ്യ വകുപ്പ് മന്ത്രിയ്ക്ക് സംസ്ഥാന ആരോഗ്യ വകുപ്പ് മന്ത്രി വീണാ ജോര്ജിൻ്റെ കത്ത്. കേന്ദ്ര ഡ്രഗ്സ് ആന്റ് കോസ്മെറ്റിക്സ് ആക്ട് പ്രകാരം വാക്സിൻ്റെ ഗുണനിലവാരം ഉറപ്പ് വരുത്തി സര്ട്ടിഫിക്കറ്റ് നല്കുന്നത് കേന്ദ്ര ഡ്രഗ് ലബോറട്ടറിയാണ്.
കേന്ദ്ര ഡ്രഗ്സ് ലബോറട്ടറില് പരിശോധിച്ച് ഗുണനിലവാര സര്ട്ടിഫിക്കറ്റ് ലഭ്യമായ വാക്സിനും സെറവുമാണ് നായ്ക്കളില് നിന്നുള്ള കടിയേറ്റ് ആശുപത്രികളില് എത്തിയവര്ക്കും മരണമടഞ്ഞ അഞ്ചുപേര്ക്കും നല്കിയത്. വാക്സിന് നല്കിയിട്ടും പേവിഷബാധ മരണം സംഭവിച്ചത് സംബന്ധിച്ച് പൊതുജനങ്ങളില് ആശങ്കയുണ്ടെന്നും മന്ത്രി അറിയിച്ചു.
ഉപയോഗിച്ച വാക്സിൻ്റെയും സെറത്തിൻ്റെയും കേന്ദ്ര ലാബിൻ്റെ ഗുണനിലവാര സര്ട്ടിഫിക്കറ്റും ബാച്ച് നമ്പരും ഉള്പ്പെടെയാണ് മന്ത്രി കത്തയച്ചത്. കെ.എം.എസ്.സി.എല്-നോട് വീണ്ടും വാക്സിന് പരിശോധനയ്ക്കയ്ക്കാന് സംസ്ഥാന ആരോഗ്യ വകുപ്പ് നിര്ദേശം നല്കിയിട്ടുണ്ട്. പൊതുജനങ്ങളുടെ ആശങ്ക പരിഹരിക്കുന്നതിന് പരിശോധന വേഗത്തിലാക്കാന് നിര്ദേശം നല്കണമെന്നും മന്ത്രി കത്തിലൂടെ ആവശ്യപ്പെട്ടു.
അതേസമയം, കേരളത്തിലെ വര്ധിച്ചുവരുന്ന തെരുവ് നായ ആക്രമണങ്ങള്ക്കെതിരായ ഹര്ജി സുപ്രീംകോടതി വെള്ളിയാഴ്ച പരിഗണിക്കും. അഭിഭാഷകനായ വി.കെ ബിജുവാണ് കേരളത്തിലെ തെരുവുനായ പ്രശ്നം സുപ്രീംകോടതിയുടെ ശ്രദ്ധയില്പ്പെടുത്തിയത്.
പേവിഷബാധ തടയുന്നതിനുള്ള പ്രതിരോധ കുത്തിവെയ്പിൻ്റെ ലഭ്യത കുറവും കേരളത്തില് പ്രതിസന്ധി സൃഷ്ടിക്കുന്നു. പേവിഷബാധയുടെ ദുരിതം നേരിടുന്നത് പാവപ്പെട്ടവരും കുട്ടികളുമാണ്. അതിനാല് തെരുവുനായ പ്രശ്നത്തില് സുപ്രീംകോടതി തന്നെ നിയോഗിച്ച ജസ്റ്റിസ് സിരിജഗന് കമ്മിറ്റിയില് നിന്ന് വിഷയത്തില് അടിയന്തര റിപ്പോര്ട്ട് തേടണമെന്നും ഹര്ജിക്കാരന് ആവശ്യപ്പെട്ടു.
ഇതിനിടയിൽ, പേവിഷബാധ സംബന്ധിച്ച പഠനം നടത്തുന്നതിന് വിദഗ്ധ സമിതി രൂപീകരിച്ചതായി ആരോഗ്യമന്ത്രി വീണാ ജോര്ജ് അറിയിച്ചു. മുഖ്യമന്ത്രിയുടെ അനുമതിയോടെയാണ് സമിതി രൂപീകരിച്ചത്. മെഡിക്കല് വിദ്യാഭ്യാസ വകുപ്പ് ഡയറക്ടര് ചെയര്മാനായ കമ്മിറ്റിയില് ഇന്സ്റ്റിറ്റ്യൂട്ട് ഓഫ് വൈറോളജി ഡയറക്ടര് ഡോ. ഇ. ശ്രീകുമാര്, ഡബ്ല്യുഎച്ച്ഒ കോളാബെറേറ്റ് സെൻ്റെര് ഫോര് റഫറന്സ് ആന്റ് റിസര്ച്ച് ഫോര് റാബീസ് നിംഹാന്സ് ബാംഗളൂര് അഡീഷണല് പ്രൊഫസര് ഡോ. റീത്ത എസ്. മണി, ഡ്രഗ് കണ്ട്രോളര്, തിരുവനന്തപുരം മെഡിക്കല് കോളേജ് ഇന്ഫെക്ഷ്യസ് ഡിസീസ് വിഭാഗം മേധാവി ഡോ. അരവിന്ദ്, പാലോട് സ്റ്റേറ്റ് ഇന്സ്റ്റിറ്റിയൂട്ട് ഫോര് അനിമല് ഡിസീസ് ഡെപ്യൂട്ടി ഡയറക്ടര് ഡോ. സ്വപ്ന സൂസന് എബ്രഹാം, ആരോഗ്യ വകുപ്പ്, പൊതുജനാരോഗ്യ വിഭാഗം അസി. ഡയറക്ടര് എന്നിവര് അംഗങ്ങളുമാണ്. ഇതോടൊപ്പം ടേംസ് ഓഫ് റഫറന്സും പുറത്തിറക്കിയിട്ടുണ്ട്.
