തമിഴ്നാടിനും സമീപ പ്രദേശങ്ങൾക്കും മുകളിലായി ചക്രവാതചുഴി നിലനിൽക്കുന്നു.തമിഴ്നാട് മുതൽ പടിഞ്ഞാറൻ വിദർഭവരെ ന്യൂന മർദ്ദ പാത്തി നിലനിൽക്കുന്നു.ഇതിൻ്റെ ഫലമായി കേരളത്തിൽ അടുത്ത അഞ്ചുദിവസം വ്യാപകമായ മഴക്ക് സാധ്യത. ഈ ദിവസങ്ങളിൽ ഒറ്റപ്പെട്ട ശക്തമായ മഴയ്ക്കും ഇടിമിന്നലിനും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.
കുട്ടനാട് താലൂക്കിലെ പ്രഫഷണല് കോളേജുകളും അങ്കണവാടികളും ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ഓഗസ്റ്റ് 31 ആലപ്പുഴ ജില്ലാ കളക്ടര് അവധി പ്രഖ്യാപിച്ചു. നേരത്തെ നിശ്ചയിച്ച സര്വ്വകലാശാലാ പരീക്ഷകള്ക്ക് അവധി ബാധകമല്ല.
മലമ്പുഴ ഡാമിൻ്റെ വൃഷ്ടിപ്രദേശങ്ങളില് മഴ തുടരുന്ന സാഹചര്യത്തില് ഓഗസ്റ്റ് 31 ന് രാവിലെ ഒമ്പതിന് സ്പിൽവേ ഷട്ടറുകള് തുറക്കുമെന്ന് എക്സിക്യൂട്ടീവ് എന്ജിനീയര് അറിയിച്ചു. ഓഗസ്റ്റ് 30 ആറ് മണിക്കുള്ള ജലനിരപ്പ് 113.93 മീറ്ററാണ്. ഇത് റൂൾ കർവ്വ് ലൈനിനേക്കാൾ രണ്ട് സെ.മീ. കൂടുതലാണ്.
മലമ്പുഴ ഡാമിൻ്റെ താഴ്ഭാഗത്തുള്ള മുക്കൈപുഴ, കല്പ്പാത്തി പുഴ, ഭാരതപ്പുഴ എന്നിവയുടെ തീരത്ത് താമസിക്കുന്നവരും മീന്പിടുത്തക്കാരും പുഴയില് ഇറങ്ങുന്നവരും ജാഗ്രത പാലിക്കണമെന്ന് എക്സിക്യൂട്ടീവ് എന്ജിനീയര് അറിയിച്ചു.
ശക്തമായ മഴയ്ക്ക് സാധ്യത ഉള്ളതിനാലും വെള്ളപ്പൊക്കം കണക്കിലെടുത്തും കോട്ടയം ജില്ലയിൽ അങ്കണവാടികളടക്കം എല്ലാ വിദ്യാഭ്യാസ സ്ഥാപനങ്ങൾക്കും ബുധനാഴ്ച (2022 ഓഗസ്റ്റ് 31) അവധി പ്രഖ്യാപിച്ച് ജില്ലാ കളക്ടർ ഡോ. പി.കെ. ജയശ്രീ ഉത്തരവായി. മുൻ നിശ്ചയിച്ച സർവകലാശാല പരീക്ഷകൾക്ക് അവധി ബാധകമല്ല.
കനത്ത മഴ തുടരാനുള്ള സാധ്യത കണക്കിലെടുത്ത് എറണാകുളം ജില്ലയിലെ പ്രൊഫഷണൽ കോളേജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും നാളെ (31/08/2022) അവധി പ്രഖ്യാപിക്കുന്നു. കേന്ദ്രീയ വിദ്യാലയങ്ങൾക്കും അങ്കണവാടികൾക്കും അവധി ബാധകമാണ്.
പത്തനംതിട്ട ജില്ലയില് മലയോര മേഖലകളിലേക്കുള്ള രാത്രി യാത്രയ്ക്കും വിനോദസഞ്ചാരത്തിനും നിരോധനം ഏർപ്പെടുത്തിയിട്ടുണ്ട്. മലയോര മേഖലകളിലേക്കുമുള്ള എല്ലാ യാത്രകളും രാത്രി ഏഴുമുതല് രാവിലെ ആറുവരെയും തൊഴിലുറപ്പ് ജോലികള്, വിനോദ സഞ്ചാരത്തിനായുള്ള കയാക്കിംഗ് / കുട്ടവഞ്ചി സവാരി, ബോട്ടിംഗ് എന്നിവയും സെപ്റ്റംബര് രണ്ടുവരെ നിരോധിച്ചിട്ടുണ്ട്. ശക്തമായ മഴ പെയ്യുന്ന സാഹചര്യത്തില് ചെറിയ വെള്ളപ്പൊക്കം, മണ്ണിടിച്ചില്, ഉരുള്പൊട്ടല്, കാറ്റില് മരങ്ങള് കടപുഴകി വീണും പോസ്റ്റുകള് തകര്ന്നു വീണും ഉണ്ടാകാനിടയുള്ള അപകട ദുരന്ത സാധ്യതകള് ഒഴിവാക്കുന്നതിനാണ് നിരോധന ഉത്തരവ്.
പത്തനംതിട്ട ജില്ലയില് ശക്തമായ മഴ തുടരുന്ന സാഹചര്യത്തില് മണ്ണിടിച്ചില്, ഉരുള്പൊട്ടല് തുടങ്ങിയ ദുരന്ത സാധ്യതകള് ഒഴിവാക്കുന്നതിനായി സെപ്റ്റംബര് നാലുവരെ ജില്ലയിലെ എല്ലാ ക്വാറികളുടെയും പ്രവര്ത്തനം നിർത്തി വെയ്ക്കാൻ ജില്ലാ കളക്ടറും ജില്ലാ ദുരന്തനിവാരണ അതോറിറ്റി ചെയര്പേഴ്സണുമായ ഡോ. ദിവ്യ എസ്. അയ്യര് ഉത്തരവിട്ടു.
മലയോരത്ത് നിന്നും മണ്ണ് വെട്ടിമാറ്റുക, ആഴത്തിലുള്ള കുഴികള് നിര്മിക്കുക, നിര്മാണത്തിനായി ആഴത്തില് മണ്ണ് മാറ്റുക എന്നീ പ്രവര്ത്തനങ്ങളും നിരോധിച്ചിട്ടുണ്ട്. ഇക്കാര്യങ്ങള് ദുരന്ത നിവാരണ നിയമപ്രകാരം ജില്ലാ പോലീസ് മേധാവി, ജില്ലാ ജിയോളജിസ്റ്റ്, റവന്യു ഡിവിഷണല് ഓഫീസര്മാര്, തഹസീല്ദാര്മാര് എന്നിവര് ഉറപ്പുവരുത്തണമെന്നും ഉത്തരവില് പറയുന്നു.
എറണാകുളത്ത് ഉണ്ടായ കനത്ത മഴയെ തുടർന്ന് താഴ്ന്ന പ്രദേശങ്ങളിൽ വെള്ളം നിൽക്കുന്നത് എറണാകുളം ടൗൺ, എറണാകുളം ജംഗ്ഷൻ സ്റ്റേഷനുകളിൽ സിഗ്നലുകളുടെ പ്രവർത്തനത്തെ താത്കാലികമായി ബാധിച്ചിരുന്നു.അതിനാൽ ട്രെയിൻ ഗതാഗതത്തിൽ നിയന്ത്രണം ഏർപ്പെടുത്തി.
തമിഴ്നാടിനും സമീപ പ്രദേശങ്ങൾക്കും മുകളിലായി ചക്രവാതചുഴി നിലനിൽക്കുന്നു. തമിഴ്നാട് മുതൽ പടിഞ്ഞാറൻ വിദർഭവരെ ന്യൂനമർദ്ദ പാത്തി നിലനിൽക്കുന്നു. ഇതിൻ്റെ ഫലമായി കേരളത്തിൽ അടുത്ത അഞ്ചുദിവസം വ്യാപകമായ മഴക്ക് സാധ്യത. ഈ ദിവസങ്ങളിൽ ഒറ്റപ്പെട്ട ശക്തമായ മഴയ്ക്കും ഇടിമിന്നലിനും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.
