തിരുവനന്തപുരം: ഇത്തവണ കാലവർഷത്തിൽ സാധാരണയിലും കുറവ് മഴയാണ് സംസ്ഥാനത്ത് ലഭിച്ചത്. ഏകദേശം 34% ശതമാനത്തോളം മഴക്കുറവാണ് രേഖപ്പെടുത്തിയതെന്നാണ് വിവിധ കാലാവസ്ഥാ കേന്ദ്രങ്ങൾ പുറത്തുവിട്ട റിപ്പോർട്ടിൽ പറയുന്നത്. ഇതോടെ ഇത്തവണ തുലാവർഷത്തിലും മഴ കുറയുമോയെന്ന ആശങ്ക ഉയർന്നിട്ടുണ്ട്. എന്നാൽ വിവിധ അന്താരാഷ്ട്ര ഏജൻസികളുടെ തുലാവർഷ മഴ പ്രവചനം കേരളത്തിൽ സാധാരണയിൽ കൂടുതൽ മഴ ലഭിക്കുമെന്നാണ്. ഒക്ടോബർ മാസത്തിലും സാധാരണയിൽ കൂടുതൽ മഴ ലഭിച്ചേക്കുമെന്നാണ് പ്രവചനം. സെപ്റ്റംബർ അവസാനം പുറത്തുവന്ന പ്രവചനപ്രകാരമാണിത്.
കേന്ദ്ര കാലാവസ്ഥാ വകുപ്പ് (IMD)യുടെ പ്രവചന പ്രകാരം തുലാവർഷത്തിൽ (ഒക്ടോബർ- ഡിസംബർ) സാധാരണയിൽ കൂടുതൽ മഴയാണ് കേരളത്തിൽ പ്രവചിക്കുന്നത്. ഒക്ടോബർ മാസത്തിലും സാധാരണയിൽ കൂടുതൽ മഴ ലഭിക്കും. ഓസ്ട്രേലിയൻ കാലാവസ്ഥ ഏജൻസിയും കേരളത്തിൽ തുലാവർഷം സാധാരണയിൽ കൂടുതൽ എന്നാണ് പ്രവചിച്ചിരിക്കുന്നത്. എന്നാൽ ജപ്പാൻ മീറ്റിയറോളജിക്കൽ ഏജൻസിയുടെ പ്രവചനം സാധരണയിൽ കുറവ് മഴയായിരിക്കും എന്നാണ്.
യു.കെയിലെ യൂറോപ്യൻ സെന്റർ ഫോർ മീഡിയം റേഞ്ച് വെതർ ഫോർകാസ്റ്റിന്റെ പ്രവചനം തെക്കൻ കേരളത്തിൽ സാധാരണയിൽ കൂടുതൽ മഴ ലഭിക്കുമെന്നാണ്. യു.കെയിലെ തന്നെ കോപ്പർ നിക്കസ് ക്ലൈമറ്റ് ചേഞ്ച് സർവീസ് കേരളത്തിൽ സാധാരണയിൽ കൂടുതൽ ലഭിക്കുമെന്നും പ്രവചിക്കുന്നു. അപെക് ക്ലൈമറ്റ് സെന്റർ ദക്ഷിണ കൊറിയയും സമാന പ്രവചനമാണ് നടത്തുന്നത്.
ലോക കാലാവസ്ഥ സംഘടനയും യു.കെ മെറ്റ് ഓഫീസും തെക്കൻ കേരളത്തിൽ സാധാരണയിൽ കൂടുതൽ മഴ ലഭിക്കുമെന്ന് പ്രവചിക്കുമ്പോൾ, അമേരിക്കയിലെ നാഷണൽ സെന്റർ ഫോർ എൻവിറോൺമെന്റൽ പ്രെഡിക്ഷൻ കേരളത്തിൽ സാധാരണ മഴയ്ക്കോ, സാധരണയിൽ കൂടുതൽ മഴയ്ക്ക് സാധ്യതയെന്നാണ് പറയുന്നത്.
ഒക്ടോബർ മാസത്തിൽ തെക്കൻ കേരളത്തിൽ സാധാരണയിൽ കൂടുതൽ മഴ ലഭിച്ചേക്കുമെന്നും പ്രവചനമുണ്ട്. ഒക്ടോബറിൽ സാധാരണയിൽ കൂടുതൽ മഴ ലഭിച്ചേക്കുമെന്നാണ് ഈ ഏജൻസികളെല്ലാം പ്രവചിക്കുന്നത്.
