ന്യൂഡല്ഹി: ഡല്ഹിയിലെ ആശുപത്രിയില് ഉണ്ടായ വന് തീപിടിത്തത്തില് ഏഴ് നവജാത ശിശുക്കള് വെന്തുമരിച്ച സംഭവത്തില് ആശുപത്രി ഉടമ അറസ്റ്റില്. സംഭവത്തിന് ശേഷം ഒളിവിലായിരുന്ന വിവേക് വിഹാറിലെ ബേബി കെയര് ന്യൂബോണ് ആശുപത്രിയുടെ ഉടമയായ ഡോക്ടര് നവീന് കിച്ചിയെയാണ് ഡല്ഹി പൊലീസ് അറസ്റ്റ് ചെയ്തത്. ഡല്ഹിയില് നിന്ന് തന്നെയാണ് പൊലീസ് സംഘം പ്രതിയെ പിടികൂടിയത്.
പൊള്ളലേറ്റ അഞ്ചു കുഞ്ഞുങ്ങള് ഇപ്പോഴും ഗുരുതരാവസ്ഥയില് ചികിത്സയിലാണ്. ഇന്ത്യന് ശിക്ഷാ നിയമത്തിലെ വിവിധ വകുപ്പുകള് അനുസരിച്ചാണ് നവീന് കിച്ചിയ്ക്കെതിരെ കേസെടുത്തിരിക്കുന്നത്.
കുറ്റകരമായ നരഹത്യയും ഉടമയ്ക്കെതിരെ ചുമത്തുമെന്നാണ് ഡല്ഹി പൊലീസ് വൃത്തങ്ങള് നല്കുന്ന സൂചന.
ഞായറാഴ്ച രാത്രിയാണ് തീപിടിത്തമുണ്ടായത്. രാത്രി 11.30 മണിയോടെയാണ് ആശുപത്രിയില് തീ ഉയര്ന്നത്. തുടര്ന്ന് അടുത്തുള്ള രണ്ട് കെട്ടിടങ്ങളിലേക്ക് കൂടി തീ ആളിപ്പടരുക ആയിരുന്നുവെന്നാണ് ഡല്ഹി ഫയര്ഫോഴ്സ് അറിയിച്ചത്.
