ചുരുളി സിനിമയുമായി ബന്ധപ്പെട്ട വിവാദത്തിൽ വിശദീകരണവുമായി സെൻസർ ബോർഡ് രംഗത്ത്. അനുമതി നൽകിയ പതിപ്പല്ല ഒ.ടി.ടിയിൽ പ്രദർശിപ്പിച്ചത് എന്നാണ് സെൻസർബോർഡ് പറയുന്നത്. നിർദ്ദേശിച്ച മാറ്റങ്ങൾ സിനിമയിൽ വരുത്തിയിട്ടില്ലെന്നും എ സർട്ടിഫിക്കറ്റാണ് നൽകിയതെന്നും അധികൃതർ കൂട്ടിച്ചേർത്തു.
സിനിമയിലെ തെറിപ്രയോഗവും ഭാഷയും ചർച്ചകൾക്കും വിവാദങ്ങൾക്കും വഴി വച്ചിരുന്നു. തെറിപ്രയോഗം കഥാപാത്രങ്ങളുമായി ചേർന്നു കിടക്കുന്നതാണ് ഇത് പ്രമേയവുമായി ആഴത്തിൽ ബന്ധപ്പെട്ടു കിടക്കുന്നു എന്ന് ഒരു പക്ഷം വാദിക്കുന്നു.
എന്നാൽ കുടുംബത്തിനൊപ്പം സിനിമ കാണാൻ കഴിയില്ല എന്നാണ് മറുപക്ഷത്തിൻ്റെ വാദം. യൂത്ത് കോൺഗ്രസും സിനിമയ്ക്കെതിരെ രംഗത്ത് വന്നിരുന്നു. സിനിമാറ്റോഗ്രാഫ് ആക്ട് 1952, സർട്ടിഫിക്കേഷൻ റൂൾസ് 1983 കേന്ദ്ര സർക്കാർ മാർഗ നിർദേശങ്ങൾ ഇവ പ്രകാരം സിനിമയിൽ അവശ്യമായ മാറ്റങ്ങൾ നിർദ്ദേശിച്ച് എ സർട്ടിഫിക്കറ്റാണ് സെൻസർ ബോർഡ് ‘ചുരുളി’ക്കു നൽകിയത്.
എന്നാൽ ഈ മാറ്റങ്ങൾ ഇല്ലാതെയാണ് സിനിമ ഒ.ടി.ടിയിലൂടെ പുറത്തു വന്നിരിക്കുന്നതെന്നും സെൻസർ ബോർഡ് പത്രക്കുറിപ്പിൽ വ്യക്തമാക്കി.
