തിരുവനന്തപുരം: ഒരു മാസത്തെ ക്ഷേമപെൻഷൻ കുടിശ്ശിക നൽകാൻ പണം അനുവദിച്ച് ധനവകുപ്പ്. തിങ്കളാഴ്ച മുതൽ വിതരണം ആരംഭിക്കാനാണ് ധനവകുപ്പ് നിർദേശം നൽകിയിരിക്കുന്നത്. ഇതിനായി 900 കോടി രൂപയാണ് ധനവകുപ്പ് അനുവദിച്ചത്. ക്ഷേമ പെൻഷൻ വിതരണം അടുത്തയാഴ്ച മുതൽ ആരംഭിക്കുമെന്ന് ധനമന്ത്രി കെ.എൻ ബാലഗോപാൽ പറഞ്ഞു.
നാല് മാസത്തെ കുടിശ്ശികയിൽ ഒരു മാസത്തെ കുടിശ്ശിക നൽകുമെന്ന് ബുധനാഴ്ച ധനമന്ത്രി വ്യക്തമാക്കിയിരുന്നു. കേന്ദ്രത്തിൽ നിന്ന് കേരളത്തിന് ലഭിക്കാനുള്ള വിഹിതത്തിലുണ്ടായ തടസ്സമാണ് പ്രതിസന്ധിക്ക് കാരണമെന്ന് ധനമന്ത്രി പറഞ്ഞു. പണം കണ്ടെത്താൻ വൈകിയതാണ് ക്ഷേമ പെൻഷൻ വിതരണം വൈകാൻ കാരണമായതെന്ന് അദ്ദേഹം കൂട്ടിച്ചേർത്തു.
കേരളത്തെ കേന്ദ്രം ശ്വാസം മുട്ടിക്കുകയാണ്. 54,000 കോടി രൂപയാണ് കേന്ദ്രം സംസ്ഥാനത്തിന് നൽകാനുള്ളത്. കേന്ദ്രം തരാനുള്ളത് മര്യാദയ്ക്ക് നൽകണമെന്നും മന്ത്രി വ്യക്തമാക്കി.
ഈ മാസം പതിനെട്ട് മുതൽ മുഖ്യമന്ത്രി പിണറായി വിജയനും മന്ത്രിമാരും നിയോജക മണ്ഡലാടിസ്ഥാനത്തിൽ നവകേരള സദസ്സ് ആരംഭിക്കാനിരിക്കെയാണ് ക്ഷേമപെൻഷൻ കുടിശ്ശിക വിതരണം ആരംഭിക്കാൻ സർക്കാർ തയ്യാറെടുക്കുന്നത്. ക്ഷേമ പെൻഷൻ വിതരണത്തിൽ നാല് മാസത്തെ കുടിശ്ശികയാണ് നിലവിലുള്ളത്. ഇതിൽ നിന്നുള്ള ഒരു മാസത്തെ കുടിശ്ശികയാണ് തിങ്കളാഴ്ച മുതൽ വിതരണം ചെയ്യാൻ സർക്കാർ നിർദേശം നൽകിയത്.
മറ്റ് ചെലവുകളിൽ വെട്ടിച്ചുരുക്കലുകൾ വരുത്തി ക്ഷേമ പെൻഷനുകൾ വേഗത്തിൽ നൽകാൻ സർക്കാർ ശ്രമം നടത്തിയിരുന്നു. ഓണത്തോട് അനുബന്ധിച്ച് മേയ്, ജൂൺ മാസങ്ങളിലെ പെൻഷൻ വിതരണം ച് ചെയ്തുവെങ്കിലും തുടർന്നുള്ള ജൂലൈ, ഒക്ടോബർ വരെയുള്ള നാല് മാസത്തെ ക്ഷേമപെൻഷൻ വിതരണം മുടങ്ങി. സംസ്ഥാനത്തെ കടുത്ത സാമ്പത്തിക പ്രതിസന്ധിയാണ് ക്ഷേമപെൻഷൻ വൈകാൻ കാരണമായത്.
