കല്പ്പറ്റ / വയനാട്: രാഹുല് ഗാന്ധിയുടെ ഓഫീസ് ആക്രമിച്ച സംഭവത്തില് 25 എസ്.എഫ്.ഐ പ്രവര്ത്തകര് അറസ്റ്റില്. ജില്ലാ പ്രസിഡണ്ട് ജോയല് ജോസഫ്, സെക്രട്ടറി ജിഷ്ണു ഷാജി എന്നിവരടക്കം 25 പേരാണ് പിടിയിലായത്. കൂടുതല് പ്രവര്ത്തകരുടെ അറസ്റ്റ് ഇന്നുണ്ടാവുമെന്നാണ് സൂചന. പാര്ട്ടിതലത്തിലും പ്രവര്ത്തകര്ക്കെതിരെ നടപടിയുണ്ടായേക്കും. നേരത്തെ ഓഫീസ് ആക്രമണത്തിന് പിന്നാലെ കല്പ്പറ്റ ഡി.വൈ.എസ്.പിയെ സസ്പെന്ഡ് ചെയ്തിരുന്നു. മനോജ് എബ്രഹാമിനെ അന്വേഷണച്ചുമതല ഏല്പ്പിക്കുകയും ചെയ്തിരുന്നു.
രാഹുല് ഗാന്ധി എം.പിയുടെ കല്പ്പറ്റയിലെ ഓഫിസിന് നേരെ എസ്.എഫ്.ഐ വയനാട് ജില്ലാ കമ്മിറ്റിയുടെ നേതൃത്വത്തില് നടന്ന സമരവും തുടര്ന്നുണ്ടായ ആക്രമണവും അംഗീകരിക്കാനാവില്ലെന്നും ഇതിനെ തള്ളിപ്പറയുന്നുവെന്നും എസ്.എഫ്.ഐ സംസ്ഥാന നേതൃത്വം വ്യക്തമാക്കിയിരുന്നു. ബഫര് സോണ് വിധിയുമായി ബന്ധപ്പെട്ട് സമരം സംഘടിപ്പിക്കാന് എസ്.എഫ്.ഐ സംസ്ഥാന കമ്മിറ്റി തീരുമാനിച്ചിട്ടില്ല.
രാഹുല് ഗാന്ധിയുടെ ഓഫീസിലേക്ക് എസ്.എഫ്.ഐ വയനാട് ജില്ലാ കമ്മിറ്റിയുടെ നേതൃത്വത്തില് സംഘടിപ്പിച്ച മാര്ച്ചിന് എസ്.എഫ്.ഐ സംസ്ഥാന നേതൃത്വത്തിൻ്റെ അറിവോ സമ്മതമോ ഉണ്ടായിരുന്നില്ലെന്നും സംസ്ഥാന പ്രസിഡണ്ട് കെ.അനുശ്രീ സംസ്ഥാന സെക്രട്ടറി പി.എം ആര്ഷോ എന്നിവര് പ്രസ്താവനയിലൂടെ അറിയിച്ചു.
ഇതുമായി ബന്ധപ്പെട്ട് എന്താണ് സംഭവിച്ചത് എന്ന് സംഘടനാപരമായി പരിശോധിച്ച് സമരത്തിന് നേതൃത്വം നല്കിയ പ്രവര്ത്തകര്ക്ക് നേരെ ശക്തവും മാതൃകാപരവുമായ സംഘടനാ നടപടി സ്വീകരിക്കും. ഒറ്റപ്പെട്ട ഈ സംഭവം ഉയര്ത്തിപ്പിടിച്ച് എസ്.എഫ്.ഐയെ മോശമായി ചിത്രീകരിക്കാനുള്ള വലതുപക്ഷത്തിൻ്റെ രാഷ്ട്രീയ അജണ്ട പൊതുസമൂഹവും വിദ്യാര്ത്ഥികളും തിരിച്ചറിയണമെന്നും എസ്.എഫ്.ഐ ആവശ്യപ്പെട്ടിരുന്നു.
