സംസ്ഥാനത്തിന്റെ വിവിധ ഭാഗങ്ങളിൽ ഇന്ന് ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. പത്ത് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. ഈ മാസം നാല് വരെയാണ് ശക്തമായ മഴക്കുള്ള സാധ്യതയെന്ന് മുന്നറിയിപ്പ് നല്കിയിരിക്കുന്നത്.
ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാല് പൊതുജനങ്ങള് ജാഗ്രത പാലിക്കണമെന്നും ജില്ലയിലെ കണ്ട്രോള് റൂമുകള് താലൂക്ക് അടിസ്ഥാനത്തില് മഴയുടെ സാഹചര്യം വിലയിരുത്തേണ്ടതുമാണെന്നും ദുരന്തനിവാരണ അതോറിറ്റി മുന്നറിയിപ്പ് നല്കുന്നു.
ഇന്ന് കൊല്ലം, ആലപ്പുഴ, കോട്ടയം, എറണാകുളം, ഇടുക്കി, മലപ്പുറം, കോഴിക്കോട്, വയനാട്, കണ്ണൂര് ജില്ലകളില് യെല്ലോ അലര്ട്ട് പ്രഖ്യാപിച്ചു. നാളെ നാല് ജില്ലകള്ക്കാണ് ജാഗ്രതാ നിര്ദേശം. പടിഞ്ഞാറന് കാറ്റ് ശക്തമായതാണ് മഴക്ക് കാരണം. ബംഗാള് – ഒഡീഷ തീരത്ത് അടുത്ത 48 മണിക്കൂറിനുള്ളില് ന്യൂനമര്ദ്ദം രൂപപ്പെടാനും സാധ്യതയുണ്ട്.
കേരള തീരത്ത് മല്സ്യബന്ധനത്തിന് പോകുന്നതില് തടസ്സമില്ലെന്നും എന്നാല് നാലാം തിയതിവരെ 45 മുതല് 55 കിലോമീറ്റര് വരെ വേഗതയില് ശക്തമായ കാറ്റ് വീശാന് സാധ്യതയുള്ളതിനാല് ജാഗ്രത പുലര്ത്തണമെന്നും മുന്നറിയിപ്പുണ്ട്.
