കേരളത്തിലെ മഴക്കെടുതി നേരിടാന് ദേശീയ ദുരന്തനിവാരണസേനയെ വിളിക്കാന് സര്ക്കാര് തീരുമാനം. മഴ തുടരുന്നതിനെ തുടര്ന്ന് ഇന്ന് മുഖ്യമന്ത്രി വിളിച്ച ചേര്ത്ത അടിയന്തരയോഗത്തിലാണ് തീരുമാനം. ദുരന്ത നിവാരണ സേനയുടെ 10 യൂണിറ്റിനെ വിളിക്കാനാണ് തീരുമാനം. അതേസമയം ജനങ്ങള് ആശങ്കപ്പെടേണ്ട സാഹചര്യമില്ലെന്ന് മുഖ്യമന്ത്രി അറിയിച്ചു.
മഴ ശക്തമായതോടെ വടക്കന് കേരളത്തിലും ഇടുക്കിയിലും നിരവധി ഇടങ്ങളില് ഉരുള് പൊട്ടലും വെള്ളപ്പൊക്കവുമുണ്ടായിട്ടുണ്ട്. മലപ്പുറം, വയനാട്, കണ്ണൂര്, ഇടുക്കി ജില്ലകളിലാണ് ശക്തമായ മഴയും നാശനഷ്ടങ്ങളും റിപ്പോര്ട്ട് ചെയ്യുന്നത്. കോട്ടയം ജില്ലയില് മണിമലയാര് പുഴ കരകവിഞ്ഞൊഴുകി. മുണ്ടക്കയത്ത് വീടുകളില് വെള്ളം കയറി. വളപട്ടണം പുഴയും കരകവിഞ്ഞൊഴുകുകയാണ്. പമ്പയിലും ജലനിരപ്പ് ഉയരുകയാണ്.
കനത്ത മഴ വയനാട് ജില്ലയെ സാരമായി ബാധിച്ചിട്ടുണ്ട്. വയനാട് കുഞ്ഞോം കോളനിയില് നിരവധി കുടുംബങ്ങള് ഒറ്റപ്പെട്ടു. ഇടുക്കിയില് വ്യാപക മണ്ണിടിച്ചില് റിപ്പോര്ട്ട് ചെയ്യുന്നുണ്ട്. ചെറുതോണി ചുരുളിയിളും നേര്യമംഗലം റൂട്ടിലും മണ്ണിടിഞ്ഞു. പന്നിയാര്ക്കുട്ടി, രാജാക്കാട്, വെള്ളത്തൂവല് മേഖലകളിലും മണ്ണിടിച്ചില് റിപ്പോര്ട്ട് ചെയ്തിട്ടുണ്ട്. ഇക്കനഗറില് വീടുകളിലേയ്ക്ക് വെള്ളം കയറുകയാണ്.
ഇടുക്കി-എറണാകുളം റൂട്ടില് വാഹനഗതാഗതം തടസപ്പെട്ടു. മൂന്നാറില് വെള്ളപ്പൊക്കമാണെന്നാണ് റിപ്പോര്ട്ട് വരുന്നത്. വീടുകളില് വെള്ളം കയറി. റോഡുകളും പാലങ്ങളും വെള്ളത്തിനടിയിലായി. ഇരവികുളം റോഡിലെ പെരിയവര പാലം തകര്ന്ന് മറയൂര് മേഖല ഒറ്റപ്പെട്ടു.
കൊട്ടിയൂര് ശക്തമായ ചുഴലിക്കാറ്റ് രൂപപ്പെട്ടു. ചുഴലിക്കാറ്റില് കെട്ടിടങ്ങള് തകര്ന്നു. മഴ നില്ക്കാതെ പെയ്യുകയാണ്. മട്ടന്നൂര് ഇരിക്കൂര് ഭാഗത്ത് പല വീടുകളും വെള്ളത്തില് മുങ്ങി ഒറ്റപ്പെട്ട അവസ്ഥയിലാണ്. പറശ്ശിനികടവ് അമ്പലത്തിലും വെള്ളം കയറി.
കണ്ണൂര് ജില്ലയില് രണ്ടിടത്ത് ഇന്നലെ ഉരുള്പൊട്ടി. അടക്കാതോട്, ബ്രഹ്മഗിരി എന്നിവിടങ്ങളിലാണ് ഇന്നലെ ഉരുള്പൊട്ടല് ഉണ്ടായത്. അപകടത്തില് ആളപായമില്ല. ഇരിട്ടി പുഴയും കരകവിഞ്ഞൊഴുകുകയാണ്. മണിക്കടവില് മൂന്ന് പാലങ്ങള് വെള്ളത്തിനടിയിലായി. മണിക്കടവ്, പീടികക്കുന്ന് പ്രദേശങ്ങള് ഒറ്റപ്പെട്ട നിലയിലാണ്. ശ്രീകണ്ഠാപുരത്തും നിരവധി കുടുംബങ്ങള് ഒറ്റപ്പെട്ടു.
