കാഞ്ഞങ്ങാട്: അഞ്ചുദിനരാത്രങ്ങള്‍ കാഞ്ഞങ്ങാടിന്റെ ജനമനസുകളില്‍ സ്വാധീനം സൃഷ്ടിച്ച ‘പെരുമ’യ്ക്ക് വെള്ളിയാഴ്ച സമാപനം. കാഞ്ഞങ്ങാട് നഗരം സമീപകാലത്ത് അനുഭവിച്ചറിഞ്ഞ ഏറ്റവും വലിയ ഉല്‍പ്പന്നപ്രദര്‍ശനവിപണനസാംസ്‌ക്കാരികമേളയ്ക്കാണ് നാളെ സമാപനമാകുന്നത്. ഇന്നും നാളെയും പ്രദര്‍ശന മേളയിലേക്ക് പ്രവേശനം സൗജന്യമാണ്. രാവിലെ 11 മുതല്‍ രാത്രി 8.30 വരെയാണ് പ്രദര്‍ശന മേള. ദിവസവും വൈകിട്ട് 6.30 മുതല്‍ നടക്കുന്ന കലാപരിപാടികള്‍ക്കും വന്‍ജന പങ്കാളിത്തമാണ്. അക്ഷയ സെന്ററിന്റെയും വിവിധ സര്‍ക്കാര്‍ വകുപ്പുകളുടെയും സ്റ്റാളുകളില്‍ അഭൂതപൂര്‍വ്വമായ ജനപങ്കാളിത്തമാണ് ദൃശ്യമാകുന്നത്. മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള അപേക്ഷ ഉള്‍പ്പെടെ വ്യത്യസ്ത സര്‍ക്കാര്‍ സേവനങ്ങള്‍ക്കുള്ള അപേക്ഷകള്‍ നല്‍കുന്നതിനും പ്രദര്‍ശനത്തില്‍ സൗകര്യമുണ്ട്. ആധാറില്‍ തെറ്റ് തിരുത്തല്‍, പേര് ചേര്‍ക്കല്‍, ഇലക്ഷന്‍ ഐഡി, ജനന മരണവിവാഹ സര്‍ട്ടിഫിക്കറ്റുകള്‍ക്ക് അപേക്ഷിക്കല്‍ തുടങ്ങിയ സേവങ്ങള്‍ എല്ലാം തന്നെ സ്റ്റാളുകളില്‍ ലഭ്യമാണ്. സര്‍ക്കാരിന്റെ രണ്ടാം വാര്‍ഷികത്തോട്് അനുബന്ധിച്ച് കാഞ്ഞങ്ങാട് അലാമിപ്പള്ളിയില്‍ ഇന്‍ഫര്‍മേഷന്‍ ആന്റ് പബ്ലിക് റിലേഷന്‍സ് വകുപ്പും ജില്ലാ ഇന്‍ഫര്‍മേഷന്‍ ഓഫീസും ജില്ലാഭരണകൂടവും സംയുക്തമായാണ് മേള സംഘടിപ്പിച്ചിരിക്കുന്നത്.