കൊച്ചി: തനിക്കെതിരെ സോഷ്യല് മീഡിയയില് നടക്കുന്ന വ്യാജ പ്രചരണത്തിന് എതിരെ മധുപാൽ.ജനാധിപത്യത്തിന്റെ മരണം പൗരബോധത്തിന്റെയും പൗരന്റെയും മരണമാണെന്ന് സംവിധായകന് മധുപാല്. അങ്ങനെ മരിക്കാതിരിക്കാന് ജനാധിപത്യത്തിന്റെ ജ്വാല കെട്ടുപോകാതിരിക്കാന്, നമ്മള് ചോദ്യം ചോദിച്ചു കൊണ്ടേയിരിക്കണമെന്നും മധുപാല് പറഞ്ഞു.
ഇന്ത്യ ഒരു ജനാധിപത്യ രാജ്യമാണ്. ഇവിടുത്തെ ഓരോ പൗരനും അഭിപ്രായം പറയാനുള്ള സ്വാതന്ത്ര്യമുണ്ട്. അഭിപ്രായങ്ങളെ അനുകൂലിക്കാനും എതിര്ക്കാനുമുള്ള സ്വാതന്ത്ര്യമുണ്ട്. ഈ അഭിപ്രായ സ്വാന്ത്ര്യത്തെ ഖണ്ഡിക്കാന് ദേശഭക്തി, രാജ്യസുരക്ഷ തുടങ്ങിയ പല തന്ത്രങ്ങള് ഉപയോഗിക്കപ്പെടുന്നത് അടുത്ത കാലത്ത് കണ്ടു.
പക്ഷേ നമ്മള് മനസിലാക്കേണ്ടത്, എന്തുകൊണ്ട് എന്ന ചോദ്യമുന്നയിക്കുമ്പോഴാണ് ഒരു ജനാധിപത്യത്തില് ഒരു പൗരന് അയാളുടെ സ്വാതന്ത്ര്യത്തെ ഉപയോഗിക്കുന്നത്. ദേശഭക്തിയും രാജ്യസ്നേഹവും നിലനിര്ത്തിക്കൊണ്ടുതന്നെ പറയുന്നു, ഓരോ പൗരനും ചോദ്യം ചോദിക്കാന് ധൈര്യമുള്ളവരാകണം. ചോദ്യം ചോദിക്കാന് ധൈര്യമില്ലാത്ത കാലം നമ്മുടെ മരണമാണെന്ന് അദ്ദേഹം പറഞ്ഞു.
