കർണാടകയിൽ കുമാരസ്വാമി സര്ക്കാര് വിശ്വാസ വോട്ടെടുപ്പില് പരാജയപ്പെട്ടു. കോണ്ഗ്രസ് ജെ.ഡി.എസ് സര്ക്കാരിന് 99 പേരുടെ പിന്തുണ മാത്രമാണ് ലഭിച്ചത്. 105 അംഗങ്ങള് വിശ്വാസ പ്രമേയത്തെ എതിര്ത്തു.
വിശ്വാസവോട്ടെടുപ്പ് പരാജയപ്പെട്ടതോടെ കുമാര സ്വാമി ഗവര്ണറെ കണ്ട് രാജിക്കത്ത് നല്കും. മുഖ്യമന്ത്രി പദം ഒഴിയാന് താന് തയ്യാറാണെന്ന് കുമാരസ്വാമി നേരത്തെ വ്യക്തമാക്കിയിരുന്നു.
അധികാരം ഒരാളില് നിഷിപ്തമല്ലെന്നും അദ്ദേഹം സഭയില് പറഞ്ഞിരുന്നു. അതേസമയം പോരാട്ടത്തില് വിജയിച്ചില്ലെന്നും എന്നാല് ഇതിലൂടെ ബി.ജെ.പിയെ തുറന്നുകാട്ടാനായെന്നും കോണ്ഗ്രസ് വ്യക്തമാക്കി. കോണ്ഗ്രസ് ദേശീയ നേതൃത്വത്തിന്റേതാണ് പ്രതികരണം. എം.എല്.എമാര് ബിജെപിയുടെ കള്ള വാഗ്ദാനത്തില് വീണെന്നും കോണ്ഗ്രസ് പ്രതികരിച്ചു. സംസ്ഥാനത്ത് ഉടന് തന്നെ സര്ക്കാര് രൂപീകരിക്കുമെന്ന് ബി.ജെ.പി വ്യക്തമാക്കി.
ബി.ജെ.പി പാര്ലമെന്ററി ബോര്ഡ് യെദ്യൂരപ്പയെ മുഖ്യമന്ത്രി സ്ഥാനത്തേക്ക് നിര്ദേശിച്ചു. വിശ്വാസ വോട്ടെടുപ്പിലെ വിജയം ജനാധിപത്യത്തിന്റെ വിജയമാണെന്നും ബി.ജെ.പി സ്ഥിരതയുള്ള സര്ക്കാര് രൂപീകരിക്കുമെന്നും യെദ്യൂരപ്പ പ്രതികരിച്ചു. രാജിവച്ച സ്വതന്ത്ര എം.എല്എമാര് താമസിക്കുന്ന അപ്പാര്ട്ടമെന്റിന് പുറത്ത് ഇന്ന് ഉച്ചയ്ക്ക് കോണ്ഗ്രസ് പ്രവര്ത്തകര് പ്രതിഷേധിക്കുകയും പൊലീസുകാരെ ഭീഷണിപ്പെടുത്തുകയും ചെയ്തതിനെത്തുടര്ന്ന് ബെംഗ്ളൂരില് അടുത്ത രണ്ട് ദിവസത്തേക്ക് നിരോധനാജ്ഞ പ്രഖ്യാപിച്ചു.
