കൈക്കൂലി ആരോപണവും ഇതിന്റെ ദൃശ്യങ്ങൾ പുറത്തുവരികയും ചെയ്തതിനെ തുടര്ന്ന് കാസർകോട് ജനറല് ആശുപത്രിയിലെ രണ്ട് ഡോക്ടർമാരെ സസ്പെൻഡ് ചെയ്തു. അനസ്തേഷ്യ വിഭാഗം സീനിയര് കണ്സള്ട്ടന്റ് ഡോക്ടർ കെ. എം വെങ്കിടഗിരി, ജനറല് സര്ജറി വിഭാഗം കണ്സള്ട്ടന്റ് ഡോക്ടർ പി. വി സുനില് ചന്ദ്രന് എന്നിവരെയാണ് സംസ്ഥാന ആരോഗ്യമന്ത്രി കെ. കെ ശൈലജയുടെ നിര്ദ്ദേശ പ്രകാരം അന്വേഷണ വിധേയമായി സസ്പെന്ഡ് ചെയ്തത്.
ആരോപണം ഉയർന്നതിനെ തുടർന്ന് ഇവർക്കെതിരെ നടത്തിയ പ്രാഥമിക അന്വേഷണത്തില് ആരോപണത്തില് കഴമ്പുണ്ടെന്ന് കണ്ടെത്തിയതിനെ തുടര്ന്നാണ് രണ്ടുപേരേയും അന്വേഷണ വിധേയമായി സസ്പെന്ഡ് ചെയ്തത്. വിഷയത്തിൽ വിശദമായ അന്വേഷണം നടത്തി റിപ്പോര്ട്ട് സമര്പ്പിക്കാന് ആരോഗ്യ വകുപ്പ് ഡയറക്ട്രേറ്റ് വിജിലന്സ് വിഭാഗം അഡീഷണല് ഡയറക്ടര്ക്ക് നിര്ദ്ദേശവും നല്കി.
