കാസര്കോട്: ആദൂരില് ബുള്ളറ്റ് കെ.എസ്.ആര്.ടി.സി ബസിലിടിച്ച് യുവാവ് തല്ക്ഷണം മരിച്ചു. അപകടത്തില് സുഹൃത്തിന് ഗുരുതരമായി പരിക്കേറ്റു.
ആദൂര് ഗ്രാമരടുക്കയിലെ അബ്ദുല് ഖാദറിന്റെ മകന് പി.കെ സവാദ് (27) ആണ് മരിച്ചത്. കൂടെയുണ്ടായിരുന്ന ആദൂര് തെരുവത്തെ മുഹമ്മദ് കുഞ്ഞിയുടെ മകന് പി. സവാദി (22) നെ കാസര്കോട്ടെ സ്വകാര്യാശുപത്രിയില് പ്രവേശിപ്പിച്ചു.
യുവാക്കള് സഞ്ചരിച്ച ബുള്ളറ്റ് മറ്റൊരു വാഹനത്തിനെ മറികടക്കുന്നതിനിടെയാണ് എതിരെവന്ന കെ.എസ്.ആര്.ടി.സി ബസിലിടിച്ചത്. ഇടിയുടെ ആഘാതത്തില് തെറിച്ചുവീണ് തലയ്ക്ക് ഗുരുതരമായി പരിക്കേറ്റ സവാദ് തല്ക്ഷണം മരിച്ചു. ഇരുവരും ആദൂരില് നിന്നും മുള്ളേരിയ ഭാഗത്തേക്ക് പോകുമ്പോഴായിരുന്നു അപകടം. വിവരമറിഞ്ഞ് ആദൂര് എസ്.ഐ സന്തോഷ് കുമാറിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി. മൃതദേഹം പോസ്റ്റുമോര്ട്ടത്തിനായി കാസര്കോട് ജനറല് ആശുപത്രി മോര്ച്ചറിയിലേക്ക് മാറ്റി.
