ചലച്ചിത്ര വനിതാ കൂട്ടായ്മയായ ഡബ്ല്യു.സി.സിക്കെതിരെ നടന് സിദ്ദിഖ് രംഗത്ത്. നേരത്തെയും വനിതാ കൂട്ടായ്മയ്ക്കെതിരെ സിദ്ദിഖ് പ്രതികരിച്ചിരുന്നു. ആക്രമിക്കപ്പെട്ട നടിക്കുവേണ്ടി വനിതാ കൂട്ടായ്മ എന്താണ് ചെയ്തതെന്ന് സിദ്ദിഖ് ചോദിക്കുന്നു. നടിക്ക് വേണ്ടി ഒരു സഹായവും ഡബ്ല്യൂ.സി.സി ചെയ്തിട്ടില്ല. പോലീസുകാരുടെ മാനസിക സമ്മര്ദ്ദം കുറക്കുന്നതിന് റൂറല് പോലീസ് സംഘടിപ്പിച്ച പരിപാടിയിലാണ് സിദ്ദിഖ് ഇക്കാര്യങ്ങള് വെട്ടിത്തുറന്ന് പറഞ്ഞത്. നടന് കുറ്റവാളിയാണെന്ന് കോടതി പറയുകയാണെങ്കില് മാത്രം ആ രീതിയില് കണ്ടാല് മതിയെന്നും സിദ്ദിഖ് പറഞ്ഞു.
നടി ആക്രമിക്കപ്പെട്ടതിന് ശേഷം നടന്റെ പേര് നാല് മാസത്തിന് ശേഷമാണ് പറയുന്നത് ഇതില് ദുരൂഹതയുണ്ട്. നടിക്ക് വേണ്ടി നില്ക്കുന്നുവെന്ന് അവകാശപ്പെടുന്നവര് ചാനല് ചര്ച്ചകളില് മാത്രമേ രംഗത്ത് വരൂ. അവര്ക്കൊരു ആശ്വാസമായിക്കൊള്ളട്ടെയെന്ന് കരുതി സംസാരിക്കുന്നതാണെന്ന് ചിലര് പറഞ്ഞിട്ടുണ്ടെന്നും സിദ്ധിഖ് പറഞ്ഞു.
അക്രമമുണ്ടായെന്ന് അറിഞ്ഞ് ദിവസങ്ങള്ക്കുള്ളില് തന്നെ സംഘടനയുടെ ഭാരവാഹിയെന്ന നിലയിലും സഹപ്രവര്ത്തകനെന്ന നിലയിലും മുഖ്യമന്ത്രിയെയും ഡി.ജി.പിയെയും നേരില് കണ്ട് സംസാരിച്ചിരുന്നുവെന്ന് സിദ്ദിഖ് പറയുന്നു. തുടര്ന്നുള്ള മൂന്നാമത്തെ ദിവസമാണ് പ്രതികളെ പിടികൂടിയത്. നടി ഇവരെ തിരിച്ചറിയല് പരേഡില് തിരിച്ചറിയുകയും ചെയ്തു. നടിക്കൊപ്പമാണ് ഇപ്പോഴും എല്ലാവരും നില്ക്കുന്നത്.
