ന്യൂഡല്ഹി: കേന്ദ്ര വിദേശകാര്യമന്ത്രി സുഷമ സ്വരാജിന്റെ സഹായം തേടി വീണ്ടും ഒരു പാക്ക് യുവതി. കാന്സര് രോഗിയായ ഫയ്സ തന്വീറെന്ന യുവതിയാണ് സഹായം ആവശ്യപ്പെട്ട് സുഷമാജിക്ക് ട്വിറ്റര് സന്ദേശം അയച്ചിരിക്കുന്നത്. ഇന്ത്യയിലെ ചികിത്സയ്ക്കായി വിസ അനുവദിക്കാമെന്ന് സുഷമ ഉറപ്പുനല്കി. ‘മാം, താങ്കളെനിക്ക് അമ്മയെ പോലെയാണ്. ഇന്ത്യ എഴുപതാം സ്വാതന്ത്ര്യ ദിനം ആഘോഷിക്കുന്ന ഈ വേളയില് കാന്സറിനിനുള്ള ചികിത്സയ്ക്ക് ഇന്ത്യയിലെത്തുന്നതിന് മെഡിക്കല് വിസ അനുവദിക്കണമെന്നും അതിനായി സഹായിക്കണമെന്നുമാണ്’ ഫയ്സയുടെ ട്വീറ്റ്. ഉടന് തന്നെ സുഷമ സ്വരാജ് അവര്ക്ക് മറുപടിയും കൊടുത്തു. സ്വാതന്ത്യദിനാശംകള്ക്ക് നന്ദി. ഇന്ത്യയിലെ ചികിത്സയ്ക്കായി താങ്കള്ക്ക് ഞങ്ങള് വിസ അനുവദിക്കാമെന്നായിരുന്നു ട്വീറ്റ്.
ഇതോടെ അമിലോബ്ലാസ്തോമയെന്ന ട്യൂമറിന് അടിമപ്പെട്ട ഫയ്സയ്ക്ക് ഇന്ത്യയിലേക്ക് ചികിത്സയക്കെത്താന് അനുവാദം ലഭിച്ചിരിക്കുകയാണ്. നേരത്തെ ഇന്ത്യന് എംബസി ഫയ്സയുടെ വിസ നിരസിച്ചിരുന്നു. ഇതേതുടര്ന്ന് അവര് തന്റെ നിസഹായത അറിയിച്ച് കൊണ്ട് സുഷമ സ്വരാജിനെ സമീപിക്കുകയായിരുന്നു. ഗാസിയാബാദിലെ ഇന്ദ്രപ്രസ്ഥ ഡെന്റല് കോളജ് ആശുപത്രിയില് ചികിത്സ തേടാനാണ് തന്വീറിന്റെ പദ്ധതി. നേരത്തെയും പാക്ക് യുവതികള് സുഷമയുടെ സഹായം തേടിയെത്തിയിട്ടുണ്ട്. ഹിജാബ് ആസിഫെന്ന യുവതിയാണ് ഇതിന് മുമ്പ് ചികിത്സ ആവശ്യപ്പെട്ട് സുഷമയുടെ സഹായം തേടിയിരുന്നു. സുഷമാജി, താങ്കള് ഞങ്ങളുടെ പ്രാധാനമന്ത്രിയായിരുന്നെങ്കില് പാക്കിസ്ഥാന് മാറ്റം സംഭവിക്കുമായിരുന്നു എന്നാണ് ഹിജാബ് അന്ന് ട്വിറ്ററില് രേഖപ്പെടുത്തിയത്.
