തിരുവനന്തപുരം: കൊച്ചി: നടിയെ ആക്രമിക്കുന്നതിനായി ഗൂഢാലോചന നടത്തി ക്വട്ടേഷൻ നൽകിയെന്ന കേസിൽ നടൻ ദിലീപിനെതിരായ കുറ്റപത്രം തയാറായി. കൂട്ടമാനഭംഗം, ഗൂഢാലോചന, തട്ടിക്കൊണ്ടുപോകൽ, തെളിവു നശിപ്പിക്കൽ, പ്രതിയെ സംരക്ഷിക്കൽ, തൊണ്ടി മുതൽ സൂക്ഷിക്കൽ, ഭീഷണി, അന്യായമായി തടങ്കലിൽ വയ്ക്കൽ തുടങ്ങിയ വകുപ്പുകൾ ദിലീപിനെതിരെ ചുമത്തിയിട്ടുണ്ട്. കുറ്റപത്രത്തിനൊപ്പം നൽകാൻ നേരിട്ടുള്ള തെളിവുകളുടെയും സാഹചര്യ തെളിവുകളുടെയും അനുബന്ധ റിപ്പോർട്ടും പോലീസ് തയാറാക്കി.
സമീപകാലത്ത് കേരള പൊലീസ് തയാറാക്കിയ ഏറ്റവും സമഗ്രവും സൂക്ഷ്മവുമായ കുറ്റപത്രമാണിതെന്ന് അന്വേഷണ സംഘത്തിലെ മുതിര്ന്ന ഉദ്യോഗസ്ഥര് പറയുന്നു. ഇരുപതിലേറെ നിര്ണായക തെളിവുകളാണ് ചൂണ്ടിക്കാട്ടിയിട്ടുള്ളത്. പ്രതികളുടെ ജാമ്യഹര്ജി പരിഗണിക്കുന്ന വേളകളില് മുദ്രവച്ച കവറില് കോടതിയില് നേരിട്ടു സമര്പ്പിച്ചിരുന്ന വിവരങ്ങളില് കുറ്റസമ്മത മൊഴികള്, സാക്ഷിമൊഴികള്, കോടതി മുന്പാകെ നല്കിയ രഹസ്യ മൊഴികള്, ഫൊറന്സിക് റിപ്പോര്ട്ടുകള്, സൈബര് തെളിവുകള്, നേരിട്ടുള്ള തെളിവുകള്, സാഹചര്യ ത്തെളിവുകള് എന്നിവ പട്ടികയാക്കി പ്രത്യേക ഫയലുകളാക്കിയാണ് അനുബന്ധ കുറ്റപത്രമായി സമര്പ്പിച്ചിരുന്നത്. ഇതുവരെപോലീസ് വെളിപ്പെടുത്താത്ത വിവരങ്ങളും കുറ്റപത്രത്തിലുണ്ടെന്നാണു സൂചന.
യുവനടി ഉപദ്രവിക്കപ്പെട്ട് എട്ടു മാസം തികയുന്ന ഇന്നു കുറ്റപത്രം സമർപ്പിക്കാനാണു പോലീസ് തീരുമാനിച്ചതെങ്കിലും മജിസ്ട്രേട്ട് അവധിയായതിനാൽ ദിവസം മാറ്റുകയായിരുന്നു. നിയമവിദഗ്ധരും മുതിർന്ന പോലീസ് ഉദ്യോഗസ്ഥരും പങ്കെടുക്കുന്ന യോഗത്തിനു ശേഷം അടുത്ത ദിവസങ്ങളിൽ തന്നെ പ്രത്യേക അന്വേഷണ സംഘം കോടതിയിൽ കുറ്റപത്രം സമർപ്പിക്കും.
