അഗര്ത്തല: ത്രിപുരയില് യുവ മാധ്യമ പ്രവര്ത്തകനെ തട്ടിക്കൊണ്ടു പോയി മര്ദ്ദിച്ചു കൊലപ്പെടുത്തി. ‘ദിനരാത്ത്’ പ്രാദേശിക വാര്ത്താ ചാനല് റിപ്പോര്ട്ടറായ സന്താനു ഭോമിക്കിനെയാ(30)ണ് ക്രൂരമായി കൊലപ്പെടുത്തിയത്. അഗര്ത്തലയില് നിന്ന 40 കിമി അകലെയുള്ള കോവൈ ജില്ലയിലെ ചാങ്കോളയിലായിരുന്നു സംഭവം. പീപ്പിള്സ് ഫ്രണ്ട് ഓഫ് ത്രിപുരയുടെ പ്രതിഷേധ പരിപാടി റിപ്പോര്ട്ട് ചെയ്യാനെത്തിയതായിരുന്നു പശ്ചിമ ത്രിപുര ജില്ലയിലെ പ്രാദേശിക ചാനല് റിപ്പോര്ട്ടറായ സന്താനു ഭോമിക്ക്. മാന്ഡയില് ഐ.പി.എ.ഫ്.ടി നടത്തിയ പ്രതിഷേധ പ്രകടനം റിപ്പോര്ട്ട് ചെയ്യാനെത്തിയതായിരുന്നു.
റോഡ് തടസ്സപ്പെടുത്തി നടന്ന പ്രകടനം റിപ്പോര്ട്ട് ചെയ്യുന്നതിനിടെ അക്രമികള് പിന്നില് നിന്ന് അടിച്ചു വീഴ്ത്തി ഭോമിക്കിനെ തട്ടിക്കൊണ്ടു പോവുകയായിരുന്നു. ഗുരുതര പരിക്കുകളോടെ പിന്നീട് ഭോമിക്കിനെ അഗര്ത്തല മെഡിക്കല് കോളേജില് പ്രവേശിപ്പിച്ചെങ്കിലും മരിക്കുകയായിരുന്നു. ഐപിഎഫ്ടിയുമായുള്ള സംഘട്ടനത്തില് സിപിഎമ്മിന്റെ ആദിവാസി സംഘടനയായ ഗാന മുക്തി പരിഷത്തിലെ നിരവധി പ്രവര്ത്തകര്ക്ക് പരിക്കേറ്റിരുന്നു.
കോവായ് ജില്ലയില് കുറച്ചു ദിവസമായി ഇരുപ്രവര്ത്തകര് തമ്മില് സംഘര്ഷം നടക്കുകയാണ്. സംഘര്ഷം റിപ്പോര്ട്ട് ചെയ്യാനെത്തിയ മാധ്യമ പ്രവര്ത്തകനെ കൊലപ്പെടുത്തിയതിനെതിരെ വന് പ്രതിഷേധം ഉയര്ന്നിട്ടുണ്ട്.
