ന്യൂഡല്‍ഹി: രാത്രി റോഡിലിറങ്ങി സഹായത്തിനായി നിലവിളിക്കുകയും രക്ഷിക്കാനെത്തിയവരെ മുഖത്തടിച്ച് പണവും ആഭരണവും കവരുന്ന സ്ത്രീകള്‍ പിടിയിലായി. സ്വീറ്റി(24), മുസ്‌കാന്‍(25) എന്നിവരാണ് അറസ്റ്റിലായത്. ഡല്‍ഹിയിലെ മൂല്‍ചന്ദ് മെട്രോ സ്റ്റേഷനിലാണ് സംഭവം നടന്നത്. ആളുകളുടെ ശ്രദ്ധ പിടിച്ചുപറ്റിയ ശേഷം അവരുടെ പണവും വിലപിടിപ്പുള്ള മറ്റ് വസ്തുക്കളും മോഷ്ടിക്കുന്നത് സ്വീറ്റിയുടെയും മുസ്‌കാന്റെയും പതിവാണെന്ന് പൊലീസ് പറഞ്ഞു. ഇവിടെ സഹായത്തിനായി നിലവിളിച്ചപ്പോള്‍ ഓടിയെത്തിയ ആളുടെ പഴ്‌സ് മോഷ്ടിക്കാന്‍ ശ്രമിക്കുകയായിരുന്നു.ഓഗസ്റ്റ് 4ന് രാത്രി 9.30ന് പൊലീസ് പട്രോളിങ്ങിനിടെയാണ് ഇരുവരും പിടിയിലായത്. ഇവര്‍ക്ക് പിന്നാലെ ഒരാള്‍ ഓടുന്നത് ശ്രദ്ധയില്‍പ്പെട്ടതിനെ തുടര്‍ന്ന് പൊലീസ് ഇടപെട്ടത്. പെണ്‍കുട്ടികള്‍ തന്നെ തല്ലുകയും തന്റെ പഴ്സ് മോഷ്ടിച്ചെടുത്ത് ഓടുകയുമായിരുന്നെന്ന് യുവാവ് പൊലീസിനോട് പറഞ്ഞു.

യുവാവിന്റെ പഴ്സ് പെണ്‍കുട്ടികളില്‍ നിന്ന് പിടിച്ചെടുത്തു. ജീവിക്കാന്‍ മറ്റ് മാര്‍ഗങ്ങള്‍ ഇല്ലാതെ വന്നതോടെ രാത്രി പുരുഷന്‍മാരെ കബളിപ്പിച്ച് മോഷണം നടത്തിവരികയായിരുന്നു ഇരുവരും. ചില സമയത്ത് പുരുഷന്‍മാരെ ആകര്‍ഷിക്കുന്ന പോലെ പെരുമാറിയും, മറ്റ് ചിലപ്പോള്‍ സഹായത്തിനായി നിലവിളിച്ചുമാണ് മോഷണം നടത്തിയിരുന്നത്. ആളുകള്‍ ഇവരുടെ അടുത്തേക്ക് എത്തുമ്പോള്‍ രണ്ട് പേരും ചേര്‍ന്ന് അവരെ മോഷണത്തിന് ഇരയാക്കുകയായിരുന്നു പതിവ്. കഴിഞ്ഞ മൂന്ന് മാസത്തിനിടയ്ക്ക് ആറ് പേരെ ഇവര്‍ മോഷണത്തിന് ഇരകളാക്കിയിട്ടുണ്ട്. എന്നാല്‍ പലരും മാനക്കേടോര്‍ത്ത് പരാതി നല്‍കിയിട്ടില്ലെന്ന് പൊലീസ് പറഞ്ഞു.