എട്ട് വയസ്സുകാരിയെ മൃഗീയമായി പീഡിപ്പിച്ച് കൊന്ന കേസില് വിധി പറഞ്ഞ് കോടതി. ആറ് പ്രതികള് കുറ്റക്കാരെന്ന് കോടതി. ഗ്രാമത്തലവന് സാഞ്ജി റാം, മകന് വിശാല്, ദീപക് ഖജൂരിയ, സുരേന്ദര് വര്മ, തിലക് രാജ് എന്നിവരാണ് കുറ്റക്കാര്. പത്താന്കോട്ട് കോടതിയാണ് വിധി പറഞ്ഞത്. എട്ട് വയസുകാരിയെ തട്ടിക്കൊണ്ടുപോയി കൂട്ടബലാത്സംഗം ചെയ്ത് കൊന്ന കേസിലാണ് വിധി.
2018 ജനുവരിയിലായിരുന്നു രാജ്യ വ്യാപക പ്രതിഷേധങ്ങളുണ്ടാക്കിയ കത്വ കൂട്ട ബലാല്സംഗം നടന്നത്. പെണ്കുട്ടിയുടെ മാതാപിതാക്കള് അടങ്ങുന്ന ബകര്വാള് നാടോടി വിഭാഗത്തെ ഗ്രാമത്തില് നിന്നും തുരത്തിയോടിക്കുന്നതിനാണ് പെണ്കുട്ടിയെ ദിവസങ്ങളോളം തടവില് വെച്ച് പീഡിപ്പിച്ചതെന്നാണ് കുറ്റപത്രത്തില് പറയുന്നത്. എട്ട് വയസുകാരിയായ പെണ്കുട്ടി പ്രദേശത്തെ ക്ഷേത്രത്തില് വെച്ചാണ് ക്രൂരമായ പീഡനത്തിന് ഇരയായത്.
മയക്കുമരുന്നുകള് നല്കുകയും പെണ്കുട്ടിയെ ദിവസങ്ങളോളം ക്രൂരമായി പീഡിപ്പിക്കുകയുമായിരുന്നു. ശേഷം ശ്വാസം മുട്ടിച്ചും കല്ലുകൊണ്ട് തലയ്ക്കടിച്ചും കൊലപ്പെടുത്തി. എട്ട് പ്രതികളെയാണ് സംഭവത്തില് പോലീസ് അറസ്റ്റ് ചെയ്തത്.
