ബർഗർ കഴിക്കാത്തവർ ചുരുക്കമാണ്. എന്നാൽ ഒരു ബർഗർ കഴിക്കാൻ ലോൺ എടുക്കേണ്ടി വന്നെങ്കിലോ? അത്തരത്തിൽ നിങ്ങൾക്ക് സങ്കൽപ്പിക്കാൻ കഴിയാത്ത വിലയിലുള്ള ബർഗറുകൾ ലോകത്ത് പലയിടങ്ങളിലും അവതരിപ്പിച്ചിട്ടുണ്ട്. എന്നാൽ ഇത്തരം ബർഗറുകളുടെ വില കുറച്ചിരിക്കുകയാണ് ഗോൾഡൻ ബോയ് (The Golden Boy) എന്ന ബർഗർ.

ഗോൾഡൻ ബോയിയുടെ വില കേട്ടാൽ ശരിക്കും നിങ്ങൾ ഞെട്ടും. നെതർലാൻഡിലെ ഒരു ഭക്ഷണശാലയിലാണ് വിലകൂടിയ ഈ ബർഗർ വിൽക്കുന്നത്. യൂറോ ന്യൂസിന്‍റെ റിപ്പോർട്ട് അനുസരിച്ച്, ഈ ബർഗറിന്‍റെ വില 5000 പൗണ്ട് (ഏകദേശം 4 ലക്ഷം 47 ആയിരം രൂപ) ആണ്. ഇതിനേക്കുറിച്ച് വൂർത്തുയിഗെൻ നഗരത്തിൽ സ്ഥിതിചെയ്യുന്ന Outlet De Daltons എന്ന ഫുഡ് ഔട്ട്‌ലെറ്റിന്‍റെ ഉടമ റോബർട്ട് ജെയ്ൻ ഡി വീൻ പറയുന്നത് ഇങ്ങനെയാണ് “ലോക റെക്കോർഡ് തകർക്കാൻ കുട്ടിക്കാലം മുതൽ എനിക്ക് ഒരു സ്വപ്നമുണ്ടായിരുന്നു, ഇപ്പോൾ അത് ചെയ്യാൻ കഴിയുന്നത് അതിശയകരമാണ്”

ലോകത്തിലെ ഏറ്റവും ചെലവേറിയ ബർഗർ എന്ന റെക്കോർഡ് അമേരിക്കയിലെ ഒരു റെസ്റ്റോറൻ്റിനാണ്. ഈ ഫുഡ് ഔട്ട്‌ലെറ്റ് നിർമ്മിച്ച ബർഗറിന്‍റെ വില 4200 പൗണ്ട് (ഏകദേശം 3 ലക്ഷം 72 ആയിരം രൂപ) ആണ്. ഗിന്നസ് റെക്കോർഡ് പ്രകാരം, ഏറ്റവും വിലകൂടിയ ബർഗർ എന്ന റെക്കോർഡ് 2011 മുതൽ ഈ ബർഗറിന്‍റെ പേരിലാണ്. “ആ ബർഗറിന്‍റെ ഭാരം 352.44 കിലോഗ്രാം ആണ്, ഇത് ഒരാൾക്ക് കഴിച്ച് തീർക്കാൻ കഴിയില്ല. അതിനാൽ ഇതിനെക്കാൾ മികച്ചത് ചെയ്യാൻ കഴിയുമെന്ന് ഞാൻ കരുതി.” റോബർട്ട് ജെയ്ൻ ഡി വീൻ പറയുന്നു.

ഈ ബർഗറിന്‍റെ ബണ്ണിൽ ഒരു ഗോൾഡ് ലീഫ് ഉണ്ടെന്നാണ് യൂറോ ന്യൂസ് റിപ്പോർട്ട് ചെയ്യുന്നത്. കൂടാതെ, ട്രഫിൽ (മഷ്‌റൂം), കിംഗ് ക്രാബ്, ബെലുഗ കാവിയാർ (സ്റ്റർജിയൻ എന്ന മത്സ്യത്തിന്‍റെ ബീജസങ്കലനം ചെയ്യാത്ത മുട്ടകൾ), താറാവ് മുട്ട മയോന്നൈസ്, ഡോം പെരിഗൺ ഷാംപെയ്ൻ എന്നിവ ഇത് നിർമ്മിക്കാൻ ഉപയോഗിച്ചിട്ടുണ്ട്.