കോഴിക്കോട്: മുസ്ലിം കോഓഡിനേഷന് എന്ന പേരില് നടക്കുന്ന രാജ്ഭവന് മാര്ച്ചുമായി ബന്ധമില്ലെന്ന് സമസ്ത കേരള ജംഇയ്യത്തുല് ഉലമാ. സമസ്തയുടെ അനുമതിയോ അംഗീകാരമോ ഇല്ലാതെയുള്ള ഇത്തരം പരിപാടികള്ക്ക് സംഘടനയുമായി ബന്ധമുണ്ടായിരിക്കുന്നതല്ലെന്നും വ്യക്തമാക്കി. മാര്ച്ചുമായി ബന്ധപ്പെട്ട് സമസ്ത കേരള ജംഇയ്യത്തുല് ഉലമായുടെ പേര് ഉള്പ്പെടുത്തിയുള്ള പ്രചാരണ പോസ്റ്ററുകളും മെസ്സേജുകളും സോഷ്യല് മീഡിയയിലും മറ്റും പ്രചരിപ്പിക്കുന്നതായി ശ്രദ്ധയില്പെട്ടിട്ടുണ്ട്. സമസ്ത കേരള ജംഇയ്യത്തുല് ഉലമായുടെ അനുമതിയോ അംഗീകാരമോ ഇല്ലാതെയുള്ള ഇത്തരം പരിപാടികള്ക്ക് സമസ്തയുമായി ബന്ധം ഉണ്ടായിരിക്കുന്നതല്ലെന്നും വാര്ത്താ കുറിപ്പില് പറഞ്ഞു.
പ്രവാചക നിന്ദക്കെതിരെ സമസ്ത കേരള ജംഇയ്യത്തുല് ഉലമാ ശക്തിയായി പ്രതിഷേധിക്കുകയും കുറ്റക്കാര്ക്കെതിരെ ഉചിതമായ നടപടി സ്വീകരിക്കണമെന്ന് ആവശ്യപ്പെടുകയും ചെയ്തിട്ടുണ്ട്. സമസ്തയുടെ പോഷക ഘടകമായ സുന്നി യുവജന സംഘം സംസ്ഥാന കമ്മിറ്റിയുടെ നേതൃത്വത്തില് കേരളത്തിലെ നാല് എയര്പോര്ട്ടുകള്ക്ക് മുമ്പിലും കഴിഞ്ഞ ദിവസം മാര്ച്ചും ധര്ണയും സംഘടിപ്പിക്കുകയും കേന്ദ്ര ആഭ്യന്തര മന്ത്രാലയത്തിന് നിവേദനം സമര്പ്പിക്കുകയും ചെയ്തിട്ടുണ്ട്. ഇതുമായി ബന്ധപ്പെട്ട ഏത് പരിപാടികളും സമസ്ത കേരള ജംഇയ്യത്തുല് ഉലമായുടെ അനുമതിക്കും അംഗീകാരത്തിനും വിധേയമായി മാത്രമേ സംഘടിപ്പിക്കാവൂ എന്നും കീഴ്ഘടകങ്ങളോട് നേതാക്കള് അഭ്യര്ത്ഥിച്ചതായും സമസ്ത ഓഫീസില് നിന്നും അറിയിച്ചു.
